نام نوحه :زبانحال حضرت زینب (س)به مادرش حضرت زهرا(س)

اثر: استاد صدری تبریزی

او آغلیان گوزیوه زینبون فدا آناجان
                        
بو نوعی ایلمه چوخ ناله و نوا آناجان

ندندی گل یوزیوه گوز یاشین روان ایدوسن
                     
بو زار و خسته نی دیندیر سنه فدا آناجان

سولوبدی رنگ رخون ایلوسن ندن شیون
                      
اورکده ساخلاما دردون ده برملا آناجان

بهار ابری کیمی گوزلرون دولوب گورورم
                      
که یاغدیرور منه غم بیله بیر هوا آناجان

هلال یکشبه تک گوزلرون دوتور اچیلور
                    
نقدری سختیدی دردون که یوخ دوا آناجان

بهار عمرون عجب روزگار ایتدی خزان
                   
که قالمادی داخی  گلزاریده صفا آناجان

ایوین چراغی سوننده دوتار اتاقی ظلم
                    
 سنون بو اولماقون ایلر ایوی قرا آناجان

خدادن ایستوسن هر بیر فریضه ده اولومی
                    
 منی چوخ آغلادور ایتدیقون دعا آناجان

نه تز دویوب بو جهاندا بیزی گویوب گیدوسن
                     
 چتیندی زینبوه بیله ابتلا  آناجان
نه درک ایدر بوله ثانی سنون جلالتیوی
                     
قصور فکریله ویرمز سنه بها آناجان

گوروم او ظالمین اولسون داخی عذابی شدید
                     
خدادن ایلمدی بیحیا حیا آناجان

گوزومله گوردوم اوزوم یخدیلار سنی قاپودا
                     
اوجاتدون اوندا گویه نی کیمی نوا آناجان

قاپونی یاندیروب هم ایتدیلر سنی مصدوم
                    
چیخا محال یادیمدان او ماجرا آناجان

آتام علیدن او گل صورتون نهان ایلدون
                   
که سالمیا دله غم شاه لافتا آناجان

اودون شراره سی یاندیردی دربو دیواری
                  
همان شراره دن اودلاندی نه سما آناجان

آتام علینی چکن وقته مسجده دشمن
                  
نه ظلم اولوندی اونی ایلدون رها آناجان

وظیفه بولدون امامن کمک لیقون اوزیوه
                 
یوخودی گر چه وجودونده هیچ قوا آناجان

او حالیلن گنه دوردون ایاقه حولیلن
                 
حجاب حرمتینی ایلدون بقا آناجان

باشوندا محکم ایدوب چادری دیدون قویمام
                  
امامی تک لیله لر فرقه دغا آناجان

دوشوبدی مشکله {صدری}بیزه توسل ایدوب
                
خدادن ایسته ایده حاجتین روا آناجان


-------------------------------
نام نوحه : غارت خیمه ها


گل هارداسان حۆسئن ائی شاهی زینبین

اوْد وۇردۇلار یــانێــر خــرگــاهــی زینبیـــن

 

گل هارداسان اخی ائی شاه-ی-کم سیپاه

دوْلدۇ خییامیوه بۇ فوْج-ی-کینه‌خواه

قالدێ یاخام منیم غمله‌ر الینده آه

ایندی اؤزۆن گل اوْل همراهی زینبین

 

ال غاره‌ته آچێب بۇ لئشگه‌ر جفا

اوْد وۇردۇلار یانێر اخیامه یا اخا

وجهی ندیر انام اوْغلۇ باجۇن فدا

ائتمه‌ز اثر سنه بۇ آهێ زینبین

 

گر نوش ائتمیسه‌ن جام-ی-شهاده‌تی

عاله‌مده بس هانێ قارداش علامه‌تی؟

گر زینده‌سن حۆسئن درک ائت بۇ محنتی

شئمره اسیر اوْلۇر واللاهێ زینبین

 

بیلله‌م حۆسئن سنین یوْخ جاندا طاقه‌تین

گلسه‌ن اگه‌ر وئریر زحمه‌ت جراحه‌تین

سن راحه‌ت اوْل باجۇن قۇربان-ی-قامه‌تین

گئتسین فنایه قوْی دستگاهی زینبین

 

زینب اوْ یاره‌لی جانه فدا حۆسئن

گلمه یارالێسان ایمداده یا حۆسئن

بیلله‌م نئجه کئچه‌ر بۇندان سوْرا حۆسئن

هر روز-وْ-هر شب-وْ-هر ماهی زینبین

 

من راضییه‌م ائده دۆشمه‌ن اسیر منی

تا سنده‌ن ال چکه بۇ لئشکه‌ر-ی-دنی

بۇ چؤلده شئمر-ی-دون اؤلدۆرسه گر سنی

قانه دؤنه‌ر دل-ی-آگاهی زینبین

 

ائتمه باجێ امان بۇ چؤلده شور شین

تؤکمه گؤزۆن یاشێن ائی زار-ی-بی‌موْعین

یوْخ طاقه‌تی گله فریادیوه حۆسئن

گلمه‌ز داخێ اله دئلخواهی زینبین

 

صبر ائیله ائی باجێ چوْخ ائتمه ایضطیراب

آهون ائده‌ر منی بۇ حالیله کباب

صبر ائیله تا دئسین بۇ فرقه‌ی-‌ی-عذاب

وار شئمره یالوارا ایکراهی زینبین

 

سۇ نوش ائده‌نده سن سال یاده قارداشێن

ائتمه یۆزه روان ظاهیرده گؤزیاشێن

آغلا منه نهان آچما باجێ باشێن

آللاه اؤزۆ اوْلار غمخواهی زینبین

 

هر بزم-ی-غم اوْلا صدری فغان ائیله

سال یاده زینبی اشگین روان ائیله

بۇ مئصره‌‌عی مودام وئرد زبان ائیله

گل هارداسان حۆسئن ائی شاهی زینبین