موضوع : آرزوی زیارت امام حسین (ع)
 اثر: مرحوم حاج رضا صراف تبریزی متخلص به ( صراف )

قبر پاکین یاحسین مدّتدی کی ایستر کونول

زاره گلمیش بیر مقام آه و زار ایستر کونول



معصیت کــارم منـه تـوفیقیـن هــر گـه یـار اولور

نقطه‌ی مجرم گئدر، دل محرم اسرار اولور

قبر اکبر عاشق منصوره پای دار اولور

پایدار اولماقلیقا بیر پای دار ایستر‌ کونول



کنج غمده بیر نفر یوخ منله هم آواز اولا

آز قالیبدیر مرغ روحیم جسمده‌ن پرواز اولا

ایسته بو جانیم سر کویینده پای‌انداز اولا

دوت الیمده‌ن غم گونونده غمگسار ایستر کونول


هر طرف اسکندر دل آب حیوان آختاریر

ظلمت غمده گزر، لعل بدخشان آختاریر

جان وئره‌ن عاشق همیشه کوی جانان آختاریر

جان نثار ائتمکلیگه بیر جان نثارایستر کونول



ائیله‌ییب شوق وصالین واله و حیران منی

وادی حیر‌تده قویما بئیله سرگردان منی

قورخورام سالسین آیاقدان محنت هجران منی

هجر الیندن جانه گلمیش، وصل یار ایستر کونول



پرتو نور خیالونله دولوب صحرای دل

گؤزیاشیم تک موجه گلمیش جوش ائدر دریای دل

طور عشقینده مناجات ائتمگه موسای دل

طاقت و تاب آختاریر، صبر و قرار ایستر کونول



حجله‌گاه قاسمی هر لحظه کیم یاد ائیلر‌م

نی کیمی گللم نوایه، داد و فریاد ائیلرم

عیش و عشرت مُلکینی، آهیله بر باد ائیلرم

چون تن تب‌دار، چشم اشکبار ایستر کونول



خاطریم اولموش پریشان سُنبل و سوسن کیمی

خلقیدن کسمیش علایق رشته‌سین سوزن کیمی

چوخ سئور قبرین چکه، آغوشه پیراهن کیمی

جان وئریب وصله یئنه پروانه وار ایستر کونول



تند باد هجریله سولموش گلستانیم منیم

غصه‌ده‌ن اولموش خزان گلبرگ خندانیم منیم

نطق یوخ دیلد‌ن دوشوب مرغ خوش‌الحانیم منیم

بلبل شوریده‌تک فصل بهار ایستر کونول



سیل غمدن آز قالیر بُنیاد جان اولسون خراب

زورق جسمیم او سیل‌ایچره قالیب مثل حُباب

محفل وصلون خیالیله اولوب باغریم کباب

اختیاریم یوخ نئدیم، بی‌اختیار ایستر کونول



شور عشقین شُهرتی از بس کی عالمگیر اولوب

بینوا(صرّاف) اودور مجنون بی ‌زنجیر اولوب

آب و خاک غمله گویا طینَتیم تخمیر اولوب

محنت و درد و مصیبت هر نه وار ایستر کونول
-----------------
نام نوحه : از زبان سیدالشهدا(ع) به مناسبت تاسوعا:


هله ساقـدێ قارداشـۇن اؤلمئیـوب

آنــام آغـــلامـــا، بــاجێـــم آغـــلامــا

هله گۆلشَنین گـۆلــۆ سـوْلمئیــوب

آنــام آغـــلامـــا، بــاجێـــم آغـــلامــا


آنامێن عزیزه قێزێ باجێم

هله اوْلما مایل درد و غم

قوْشۇنۇم دۇرار هامێ بیر به بیر

هله یاتمئیوبدی اسر عَلَم

هله صاحب عَلَم اؤلمیوب

هله ائتمئیوبله قوْلۇن قلم

هله مشکی قانیله دوْلمئیوب

آنام آغلاما، باجێم آغلاما



هله قۇملار اۆستۆنه دۆشمیوب

باجێ اکبرون قد نورسی

گۆن او گونده ظلمیله قالمیوب

هله پاره-پاره جنازه‌سی

هله خیمه‌لرده‌ن اۇجالمیوب

گؤیه لیلینون بالا وای سسی

هله قاره زلفی نی یولمیوب

آنام آغلاما، باجێم آغلاما



هله پوزمیوبله تفاقمی

هله رونقی وار اساسیمون

هله قوْیما ایندی عم اوْغلۇ وای

دییه نو عروسینی قاسمین

هله یاسه باتما چوْخ آغلاما

دوتوم ابتداسی دو یاسمون

هله بزم عیشی پوزولمیوب

آنام آغلاما، باجێم آغلاما



هله اؤلمیوب ایکی نورسین

جگرین باشێ هله یانمیوب

هله زلف کاکُل اکبریم

باجێ آل قان ایله بوْیانمیوب

هله اصغریم یاتوب آغلاماز

هله ظلم اوخیلن اویانمیوب

هله غم بساطی قورولمیوب

آنام آغلاما، باجێم آغلاما


باجی زینب آغلاما ساکت اول

دئمه ساکت اولماقا یوخ یئری

هله آغلاما قالور آغلاماقلقوین

زمانه ده چوخ یئری

هله یوْخ باشێمدا قلج یئری

بدنیمده یوْخ هله اوْخ یئری

هله اهل کینه یورولمیوب

آنام آغلاما، باجێم آغلاما



بۇ دیاریده ای آنام باجێ

هله ظلم لجّه‌سی داشمیوب

هله لشگر ستم و جفا

سیزه جورو ظلم الین آشمیوب

هله خیمه‌گاهیم آلیشمیوب

هله عترتیم چؤله قاشمیوب

هله کیم سکینه سویولمیوب

آنام آغلاما، باجێم آغلاما



هله شیشه‌ دل صافیوی

باجێ غم کدورتی باسمیوب

هله دین اساسی پوْزۇلمیوب

هله صرصر ستم اسمیوب

هله ظلم عرشه دایانمیوب

هله شمر باشمی کسمیوب

هله گول جمالی دوتولمیوب

آنام آغلاما، باجێم آغلاما



هله قلبون ای باجێ یانمیوب

یانار اوْدلار اۆزره کباب تک

بۇ قد‌ر سێزێلداما آغلاما

هله چکمه ناله رباب تک

باجێ قانیمی باجێلار یۆزه

هله یاخمیوبدور خضاب تک

هله اهل کین سنه گولمیوب

آنام آغلاما، باجێم آغلاما



هله هست عئشقیله هست سن

هامێ‌دان علاقه‌نی کس رضا

هله کیم حسین پرست‌سن

بۇ سؤزیله وئر اوْنا سس رضا

هله درد دردیله مست سن

ندی بو هوا و هوس رضا‍ ؟

هله ساقدی قارداشون اولمیوب

آنام آغلاما، باجێم آغلاما
---------------------
نام نوحه : از زبان حضرت امام حسین(ع) خطاب به حضرت عباس(ع)
اثر : مرحوم صراف تبریزی


دور ای دعــوالــ‌ر اصـلانـی

ابـوالـفـضـلیـم عـلـمـداریــم

آخــان سـۇ تـک قێزێـل قانـــێ

ابـوالـفـضـلیـم عـلـمـداریــم



دئیم دۇتمـۇر دیلیــم قــارداش

دۇر ای آرخام ائلیم قارداش

سێنوب سنسیز بئلیم قارداش

ابـوالـفـضـلیـم عـلـمـداریــم



کسیب دشمن یولین آخر

سالۇب ساق و صولین آخر

نه باش وار نه قولین آخر

ابـوالـفـضـلیـم عـلـمـداریــم


علمداریم زبون اولدون

قتیل قوم دون اولدون

علم تک سرنگون اولدون

ابـوالـفـضـلیـم عـلـمـداریــم


علمداریـــم زبـــون اولـــدۇن

قتیل قوم دون اولدۇن

علم تـک سرنگــون اولــدۇن

ابـوالـفـضـلیـم عـلـمـداریــم



اوغۇل یوخ دردیمی بـۆلسـۆن

منــه یـار و معیـن اولسۇن

ااوغولسیز قارداشۇن اولسۆن

ابـوالـفـضـلیـم عـلـمـداریــم



تۆکـندی طاقتیم سنسیز

بۆکۆلدی قامتیم سنسیز

قان آغلار عتر‌تیم سنسیز

ابـوالـفـضـلیـم عـلـمـداریــم



اؤزین مــقـصودیــوه یئتــدیـن

بئله احبابـی تـــرک ائتـدیــن

منی یالقۇز قـوْیـۇب گئتـدیـن

ابـوالـفـضـلیـم عـلـمـداریــم



ایـا مــاه بنــی هاشــم

منیم ایست‌کلی قارداشێم

دونــۆب آلقــانـه گــؤزیـاشێـم

ابـوالـفـضـلیـم عـلـمـداریــم



دئسم گؤرمز گؤزۆم قارداش

یقین دۆزدور سؤزۆم قارداش

سنـه قـۇربــان اؤزیم قــارداش

ابـوالـفـضـلیـم عـلـمـداریــم



اؤزۆن گئتدون خـلاص اولـدۇن

دوْلــی پئیـمانه تک دولــدۇن

گلستانێـم نه تئز سولـدۇن

ابـوالـفـضـلیـم عـلـمـداریــم



سنی کیم غرق ائدیب قـانه

سالوب بۇ قانلــێ مئیدانــه

یــانـار بــــۇ حــالــه بیــگـانـه

ابـوالـفـضـلیـم عـلـمـداریــم



بــۇ غـربـتـده وحیـد اولدۇم

کومکـد‌ن نا امـید اولدۇم

سن اؤلدۆن من شهید اولدۇم

ابـوالـفـضـلیـم عـلـمـداریــم



قـالـوب صــراف بیـچــاره

مـحیـــط غـمــــده آواره

اؤزین قیــل دردینـــه چــــاره

ابـوالـفـضـلیـم عـلـمـداریــم
------------------------
 نام نوحه : شهادت حضرت زهرا اثر: صراف تبریزی

چون محبت بزمی خلوت‌دیر عم‌اوغلێ یا علی

گل ائد‌ک صحبت غنیمتدور عم‌اوغلێ یا علی

بیر دقیقه قوْیمادیم عالمده قلبین شاد اوْلا

درد و محنتد‌ن مبارک خاطرون آزاد اوْلا

چوْخ اذیتلر سنه وئردیم ائوون آباد اوْلا

ایندی وقت رفع زحمتدور عم‌اوغلێ یا علی


دویمادێم بۇ عالم الفتده سندن آغلارام

قبرده هم ائیلرم شوریله شیون آغلارام

آغلاما مندن سورا سن آغلاسان من آغلارام

باخمارام فردوس جنتدور عم‌اوغلێ یا علی


دوْققۇز ایل اوْلدۇم بۇ دولتخانه‌ده همسر سنه

متّصل وئردیم بۇ دوْققۇز ایلده درد سر سنه

ایندی گل اگلن باشێم اۆستۆنده سرتاسر سنه

عرض ائدیم نئچه وصیّتدور عم‌اوغلێ یا علی


اوّ‌لا عرضیم بۇدۇر اؤلسم اگر بۇ گۆنده من

اؤز الینلن وئر گئجه غسلیم، گئجه ائیله کفن

ویرسا ال تابۇتیمه بیگانه راضی اوْلما سن

روحیمه آرتوق اذیّتدیر عم‌اوغلێ یا علی


ثانیا مند‌ن سوْرا ای خسرو گردون مدار

عورت آلسان بیر نجیبه عورت ائیله اختیار

غم گۆنی تا زینب و کلثومه اوْلسۇن غمگسار

ائیلسون هر نوع حرمتدور عم‌اوغلێ یا علی


بیرده قلبون مجتبی دن اینجیه هر آن سنین

گئچ حسینیم جانینه من جانۇا قربان سنین

قوْیما غم چکسون خصوصا جان حسینون جان سنون

چون او جدیند‌ن امانتدور عم‌اوغلێ یا علی


من بۇنۇن چوْخ زحمتین چکدیم نه آسان بسلد‌یم

پرورش وئردیم گۆل اۆسته طرفه ریحان بسلدیم

سسله‌‌ ینده جان دمنده جان دئدیم جان بسلدیم

چون جفاسی جانه منّتدیر عم‌اوغلێ یا علی


بۇ حسینی کیم سنه تاپشێردێم ایندی رو به رو

دقّتیلن باخ نئجه وئرسم ائله آللام گرو

باش بدنده، بارماق الده، ال بیلکده مو به مو

گؤر هامێ عضوین سلامتدور عم‌اوغلێ یا علی


چوخ مکدّر اوْلسا وار بۇ سؤزده درد سر یئری

یاخشێ باخ سالێمدو برگ گۆل تک آخر هر یئری

نه باشێندا وار قیلیج نه سینه‌ده خنجر یئری

نه بدن یکسر جرا‌حتدی عم‌اوغلێ یا علی


نور دیده‌مدور حسین باعثدی چون گؤز یاشیمه

من گؤزۆمد‌ن سالمامێش سن تاپشێر آل هاشمه

وای او گوندن کیم گورم باشین کول اولسون باشیمه

ایستی کۆللــر اۆسته راحتدور عم‌اوغلێ یا علی


عاشق جانبازدور گیرم حسینیم یوخ سؤزۆم

من ده نقد عشقی خرج ائتمکده صرّافم اؤزۆم

بیر بدن دؤرت مین یارا لاکن نئجه گؤرسۆن گؤزۆم

گؤر بۇ انصاف و مروتدور عم‌اوغلێ یا علی

------------------------------
نام نوحه: زبانحال رباب مادر علی اصغر(ع):

دوْلان قـانیلــه قــوْنـداقــێ

علی لای‌لای بالام لای‌لای

قێــزاردان قـانـێ توْپـراقی

علی لای‌لای بالام لای‌لای

گلستانون گولی سوْلسۇن

پوْزۇلسۇن پایمال اوْلسۇن

بالا سنسیز روباب اؤلسۆن

علی لای‌لای بالام لای‌لای

الیمد‌ن کیم سنی آلدێ

بئله توْپراقلارا سالدێ

آنان یاخشێ ملر قالدێ

علی لای‌لای بالام لای‌لای

آنا دهرون بلاسیندن

دؤنرمیش اؤز بالاسیند‌ن

من آیریلدیم بالا سندن

علی لای‌لای بالام لای‌لای

اێشێقلێ اۇلدۇزۇم آتدێن

منی توْپراقیده یاتدون

نه تئز چێخدون، نه تئز باتدون

علی لای‌لای بالام لای‌لای

آنان بۇ حالت زارون

گؤرۆب اوْلدی گرفتارون

دۇ گل بوْش قالدێ گهوارون

علی لای‌لای بالام لای‌لای

سنی بی‌حال ائد‌ن اوْخدۇر

یانان بۇ حالیوه چوْخدۇر

ولی لای‌لای دئین یوْخدۇر

علی لای‌لای بالام لای‌لای

کؤنۆل دردینله سرخوْشدور

قۇجاقیمده یئرون بوْشدۇر

اؤزۆم لای‌لای دئیم خوْش دۇر

علی لای‌لای بالام لای‌لای

مگر دشمن امان وئردی

سنه رحمین نشان وئردی

گؤرۆب سۆد یوْخدی قان وئردی

علی لای‌لای بالام لای‌لای

علی سن‌سیز سنی آندێم

سمندر تک اوْدا یاندێم

سسیمه سس وئر اوْدلاندێم

علی لای‌لای بالام لای‌لای

شیل اوْلسۇن قاتلون آخر

خزان ائتدی گۆلۆن آخر

نوْلۇب شیرین دیلون آخر

علی لای‌لای بالام لای‌لای

اوْیان درد وْبلان آللام

دۇرۇنجا سن اوْیاق قاللام

کشیکچون من اؤزۆم اوْللام

علی لای‌لای بالام لای‌لای

سۆدیله‌ن دوْلدۇ پستانیم

دور ای شمع شبستانیم

بهار وباغ و بستانیم

علی لای‌لای بالام لای‌لای

بۇ صرّاف سیه ‌نامه

یئتیردی شعرین اتمامه

گینه باشدان یازار خامه

علی لای‌لای بالام لای‌لای

------------------------
نام نوحه :زبانحال رباب درباره علی اصغر(ع)اثر: مرحوم صراف تبریزی


عطشان قـالێب گـۆل تک سـوْلان

لای‌لای اصغریم ای وای اصغریـم

ای قــان ایـچیـب سـیـــراب اوْلان

لای‌لای اصغریم ای وای اصغریم

کیم بئشیکده‌ن آلدێ یئرین

توْپراقلارا سالدێ یئرین

سینه‌مده بوْش قالدێ یئرین

لای‌لای اصغریم ای وای اصغریم

دهرین گۆلۆ سوْلسۇن اوْغۇل

سوْلسۇن خزان اوْلسۇن اوْغۇل

بی‌کس آنان اؤلسۆن اوْغۇل

لای‌لای اصغریم ای وای اصغریم

منی دئمه‌زدیم آتاسان

قێرمێزێ قانه باتاسان

لای‌لای دئییم یاتاسان

لای‌لای اصغریم ای وای اصغریم

سن یاخشێ شیرین دیلیدین

خوْش اوْخۇیان بۆلبۆلیدین

گل آخیرینجی گۆلیدین

لای‌لای اصغریم ای وای اصغریم

اوْخ سنی بی‌تاب ائله‌ییب

آلوده‌-ی-خواب ائله‌‌ییب

قانیله سیراب ائله‌ییب

لای‌لای اصغریم ای وای اصغریم

ای تازه گۆل تازه نهال

حالین اوْلۇبدۇ حال به حال

خێردا بالام یات یۇخۇن آل

لای‌لای اصغریم ای وای اصغریم

سسله‌ر سنی داد‌رسین

سس وئر اگر وار نفسین

اؤلمه‌میسه‌ن نوْلدۇ سسین

لای‌لای اصغریم ای وای اصغریم

سینه‌م نه‌دن داغلامێسان

شیرین سۆده باغلامێسان

توْخسان مگر آغلامێسان

لای‌لای اصغریم ای وای اصغریم

بئیله خراب ائتمه منی

بی‌صبر-وْ-تاب ائتمه منی

دیل‌دن کباب ائتمه منی

لای‌لای اصغریم ای وای اصغریم

ای آهوی-ی-وادی-ی-شوق

بوْینۇندا وار رشته‌ی-ی-ذوق

قاندێر بۇ یا قێرمێزێ طوق

لای‌لای اصغریم ای وای اصغریم

من غرق-ی-بحر مُحنم

صرّاف-ی-شیرین سُخنم

دییه‌ن اؤزگه‌دیر نه منم

لای‌لای اصغریم ای وای اصغریم
---------------------------

نام نوحه :از زبان عروس در راه شام خطاب به سر مبارک جناب قاسم(ع)

اثر: حاج رضا صرّاف تبریزی

ای عم اوْغلێ گتوروب درد وغمین جانه منی

سالوب آهـو کیمـی بــۇ دشـت و بیابانـه منی

نه بولر سلسله‌ عشقه دۆشن عار ندور

جـور بیـگـانـه نـ‌دور طعنــه‌ اغیـار نـ‌دور

بـاخمــارام دیـر و کلیســا نـــدو، بــازار نــدور

گئد‌ر‌م جذبـه عشقون چکـه هـر یانـه منـی

من عزیزم گر‌ک عالــمــده اؤلام عـزتیلــن

هۆدج تخـت روانیـم چکیلــه حرمتیلــن

ایندی هـۆدج یئرینـه، اهـل جفــا ذلتیلـن

میندیریبدور باش آچیخ ناقه‌ عریانه منـی

نیزه باشێنـدا باشێــن گـۆن کیمـی جـولانه گلوب

نــه تجــلّادی تـــماشــاسینـــه بیگــانــــه گـلوب

چکمیشم هر نه مصیبت بۇ چۆرۆک جانه گلوب

اؤلـدۆرۆر اینـدی نئدیم طعنـه‌ بیگانه منـی

من مریض غم عئشقم، منه تدبیر ندور

زلـف زنجیـری بسیـمدور، داخـێ زنجیـر ندور

بولـمور‌م آتـش آهیمـده کـی تأثیـر ند‌ور

قوْیـۇب عالمده بـۇ نـوعیـلـه یـانـا-یـانــه منــی

گئتمـ‌ر‌م شامـه عـم اوْغلـێ بـۇیـۇر آخر نئـد‌ر‌م

معجریم یـوْخســا یــۆزه زلفیمــی حاییــل ائـد‌ر‌م

آلمێشـام گـوشـه ویرانـه سـوْراغێــن گئـد‌رم

خـــانــه ویـران ائـــده تـــا منــزل ویــرانـه منــی

ئیــز‌ده بیــرجـه دوْلان حـال پـریشـانیـمـه بـاخ

دل بـریانیمـه باخ، سینـه‌ سـوزانیمـه بـاخ

قارێشێبدور گؤزۆمـۆن یاشـێ، جیگـ‌ر قانیمـه باخ

نئجـه گـؤر غـرق ائیلـ‌یوب لالـه صفـ‌ت قانه منی

عقـر‌ب زلفـی قـرین مـه تـابـان ائلـ‌دون

مـن پریشـانــی عجـــ‌ب زار و پـریشــان ائـلـ‌دون

سینه‌می نـاو‌ک مژگانیلـه شـان-شـان ائلدون

ائلـ‌دون خانــه‌ زنبــوریـلــه هــم خــانــه مـنـی

اگلنوب آیینه‌ حـسنوه کـؤنلـۆم کیمـی گَرد

دۆزۆلۆب عور‌ت اۇشاق، پیر و جـوان و زن ومـرد

هامینون فکری بۇدۇر دردیمون اۆسته قوْیـا درد

گتیروب نی کیمـی بـۇ درد و غـم افغـانـه منـی

بــۇ قـده‌ر زلفوی رخســاره نقـاب ائتمـه ‌گیـلــن

بۇنـدان آرتێـق منـی، گَـل خـانـه خـراب ائتمـه ‌گیلـ‌ن

قوْی جمالین گؤره شام اهلی، حجاب ائتمـه ‌گیلـن

چـون بولور قـوم جفـا، بـوْش یئــره دیــوانه منــی

آغلارام بزم مصیبتده، سنـه تـا ساغـم

شهر تبریزده صرّاف کیمـی دوستـاقم

نئچه مد‌تدی سنون درگَهوه مشتاقم

ایسته حضّاریله بۇ وقفه‌ قربانه منـه

---------------------


نام نوحه : در تنور خولی از زبان حضرت صدیقه طاهره خطاب بسر مبارک حضرت سیدالشهدا

اثر: مرحوم رضا صراف تبریزی

ای نــور عینیـم منـزل مبارک بی‌کس حسینیم منزل مبارک

چوخ اشک چشمون بنزتمه سئیله یاندیـم منـی گل یاندورمـا بیله

دوربیـر آنـاوا خوش گلدون ائیله ای نــور عینیــم منـزل مبارک

دینـدیر منـی مـن زهــرا آنـانم بـو دینممکـدن چوخ بدگمانم

سـن خانـه صـاحب من میهمانم ای نــور عینیــم منـزل مبارک

باشونــدو مشکـاۀ آیــات نـوره مطبخ سرانـی دؤنـدردی طوره

خولی اوتانموب قویموش تنـوره ای نــور عینیــم منـزل مبارک

لازیمـدویاتسـون بلبـل گل‌اوسته تاسایه سالسـون گل‌بلبل اوسته

دورسینمـه گل یاتمـا کول اوسته ای نــور عینیــم منـزل مبارک

کسمیشدیم ایمدی قان ایچره یانون خشک ائیله یردیم زلفمله قانون

ناگــه یئتیشـدی اؤز ساربانــون ای نــور عینیــم منـزل مبارک

ای پـــادشــاه مــلک مـــدینه اولــدون نشانـه شمشیـر کینه

سنسیز حسیـن بس نیلـر سکینه ای نــور عینیــم منـزل مبارک

وجهی ندور بس اَهلون آتوبسان چون اشک زینب قانه باتوبسان

اکبـر نولوبـدور یالقـوز یاتـوبسان ای نــور عینیــم منـزل مبارک

گوردوم ویروب‌جان‌یئتمیش‌ایکی‌جان بیر آغلیان یوخ اولدوم پریشان

گلدیـم دوتـام مـن شــام غریبان ای نــور عینیــم منـزل مبارک

گیـرم داغیلـدی جـاه و جـلالون تالانـه گئتـدی مـال و منـالون

هـاردا قالـوب بس بیکس عیالون ای نــور عینیــم منـزل مبارک

یوخسـا چکوبسن گوندوز اذیّت ایمدی اولوبسان بیر لحظه راحت

دور یاتمــا یاتمــاز اهـل محبت ای نــور عینیــم منـزل مبارک

گلدون وجـوده «صراف» عدمدن گتمـه کنــاره گل بـزم غمـدن

قوی نوحه اولسون جاری قلمدن ای نــور عینیــم منـزل مبارک


--------------------------

نام نوحه : ورود به کربلا اثر: مرحوم صراف تبریزی

هله گۆلشَنین گـۆلــۆ سـوْلمئـیــوب

آنــام آغـــلامـــا، بــاجێـــم آغـــلامــا

هله ساغـدێ قارداشـۇن اؤلمئیـوب

آنــام آغـــلامـــا، بــاجێـــم آغـــلامــا



آنامێن عزیزه قێزێ باجێم

هله اوْلما مایل-ی-درد-وْ-غم

قوْشۇنۇم دۇرار هامێ بیر به بیر

هله یاتمئیوبدی اسیر عَلَم

هله صاحب-ی-عَلَم اؤلمئیوب

هله ائتمئیوبله قوْلۇن قلم

هله مشکی قانیله دوْلمئیوب

آنام آغلاما، باجێم آغلاما



هله قۇملار اۆستۆنه دۆشمئیوب

باجێ اکبرین قد-ی-نورسی

گۆن ائوینده* ظۆلمیله قالمئیوب

هله پاره-پاره جنازه‌سی

هله خئیمه‌لرده‌ن اۇجالمئیوب

گؤیه لئیلی‌نین بالا وای سسی

هله مشکی قانیله دوْلمئیوب

آنام آغلاما، باجێم آغلاما



هله پوْزمئیوبله تیفاغیمی

هله رونقی وار اساسیمین

هله قوْیما ایندی عم اوْغلۇ وای

دییه نو عروسینی قاسمین

هله یاسه باتما چوْخ آغلاما

هله ابتداسیدی یاسیمین

هله مشکی قانیله دوْلمئیوب

آنام آغلاما، باجێم آغلاما



هله اؤلمئیوب ایکی نورسین

جیگرین باشێ هله یانمئیوب

هله زۆلف-ی-کاکُل اکبریم

باجێ آلقانینه بوْیانمئیوب

هله آغلاماز علی اصغریم

هله ظۆلم اوْخیله‌ن اوْیانمئیوب

هله مشکی قانیله دوْلمئیوب

آنام آغلاما، باجێم آغلاما



هله آغلاما قالێر آغلاماق-

لیقیوین زمانه ده چوْخ یئری

باجێ زینب آغلاما ساکت اوْل

دئمه ساکت اوْلماغا یوْخ یئری

هله یوْخ باشێمدا قێلێج یئری

بدنیمده یوْخ هله اوْخ یئری

هله مشکی قانیله دوْلمئیوب

آنام آغلاما، باجێم آغلاما



بۇ دیاریده ای آنام باجێ

هله ظۆلم لجّه‌سی داشمئیوب

هله لئشگر-ی-ستم-وْ-جفا

سیزه جور-وْ-ظۆلم الین آشمئیوب

هله خئیمه‌گاهیم آلیشمئیوب

هله عترتیم چؤله قاشمئیوب

هله مشکی قانیله دوْلمئیوب

آنام آغلاما، باجێم آغلاما



هله شیشه‌-ی-دل-ی-صافیوی

باجێ غم کدورتی باسمئیوب

هله دین اساسی پوْزۇلمئیوب

هله صر-صر-ی-ستم اسمئیوب

هله ظۆلم عرشه دایانمئیوب

هله شئمر باشیمی کسمئیوب

هله مشکی قانیله دوْلمئیوب

آنام آغلاما، باجێم آغلاما



هله قلبین ای باجێ یانمئیوب

یانار اوْدلار اۆزره کباب تک

بۇ قده‌ر سێزێلداما آغلاما

هله چکمه ناله رباب تک

باجێ قانیمی باجێلار یۆزه

هله یاخمئیوبدی خضاب تک

هله مشکی قانیله دوْلمئیوب

آنام آغلاما، باجێم آغلاما



هله هست عئشقیله هست سن

هامێ‌دان علاقه‌نی کس رضا

هله کی حسین پرست‌سن

بۇ سؤزیله وئر اوْنا سس رضا

هله سوز-ی-دردیله مست سن

نه‌دی بۇ هوا-وْ-هوس رضا

هله مشکی قانیله دوْلمئیوب

آنام آغلاما، باجێم آغلاما


------------------------------
مناجات امام حسین (ع) با خدا


دۇتمۇشام جان نقدین الـده وصـل-ی-جـانان ایستـه‌ره‌م

تئشنه جان وئرره‌م مینای-ی-عئشقیده جان ایستـه‌ره‌م



دم به دم ائیلـه‌ر تجـلّا پــرتــوی-ی-انــوار-ی-ذات

اوْلمارام موسی کیمی بیر جئلوه ایله محو-وْ-مات

خضــر تــک بــۇ عصـریــده آختــارمارام آب-ی-حیات

تئشنه‌ی-ی-وصلم کؤنۆل جامین دوْلۇ قان ایسته‌ره‌م



تشت-ی-زر ایچره قێزێل قانێم آخار «یحیــی» کیمــی

کــربــلا مئیــدانــی دوْلمــۇش قـانیلـه‌ن دریا کیمــی

زیـنبیــم اوْلســۇن پریشــان خاطـر-ی-لیلا کیمــی

پای-ی-بند-ی-زۆلف اکبردیر، پریشان ایسته‌ره‌م



طایر-ی-اوج-ی-وفایم، شهپریم تیر-ی-جفا

ائیلـه‌ره‌م روز-ی-ازلـده ائتـدیگیــم عهـده وفا

بۇ لب-ی-عطشانیلـه‌ن اوْللام ذبیحـاً مـن قفا

خنجر-ی-قاتل دمینده‌ن آب-ی-حیوان ایسته‌ره‌م



گۆلشن-ی-جیسمیمده زخم-ی-تیر آچێلمێش گۆل کیمی

هر طرف پئیکان دۆزۆلمۆش سینه‌مه سۆنبۆل کیمی

ایستـه‌ره‌م گلسیـن سکینه‌م نالییه بۆلبـۆل کیمی

قتلگه گۆلزارینه مرغ-ی-خوْش الحان ایسته‌ره‌م



مین بلایه مُبتلا اوْلسام اگر ایّوب تک

ائیله‌ره‌م صبر، ائتمه‌ره‌م شور-وْ-نوا یعقوب تک

دم به دم، ساعت به ساعت، عاشئق-ی-مجذوب تک

بیــر بلایــه وئرمه‌گه شــوقیله منین جان ایسته‌ره‌م



کسـب ائـدیـب مئـرآت-ی-انــوار-ی-محبّتلــه‌ن جلا

اوْلـمۇشــام سرمسـت-ی-جــام-ی-«البـلاءُ لِلـوِلا»

بــزم-ی-وحــدت‌دیر منه بۇ سرزمین-ی-کـربلا

ترک-ی-کثرت ائتمه‌گه، بیر نوک-ی-پئیکان ایسته‌ره‌م



بیر طرفده کاکُل-ی-اکبر بوْیانمێش قانیله

بیر طرفده اصغریم سیراب اوْلۇب پئیکانیله

بیر طرف جان وئردی عبّاسیم لب-ی-عطشانیله

بیر طرف اؤز جیسمیمی خاکیله یئکسان ایسته‌ره‌م



جئلوه‌گاه-ی-محضرینده ائیله‌ره‌م سعی-وْ-صفا

خئیمه‌گه میقات-وْ-مَشعر، قتلگه کوه-ی-مِنا

ایسته‌ره‌م بیر اکبر-وْ-عبداللّهیم اوْلسۇن فدا

بۇ بلا دشتینده یئتمیش ایکی قۇربان ایسته‌ره‌م



شعله‌ی-ی-نار-ی-محبّتله دوْلۇب کانون-ی-دل

وادی-ی-حئیره‌تده لیلا آختارێر مجنون-ی-دل

مجلیسیم خلوت، گؤزۆم یاشلێ، شرابیم خون-ی-دل

گلمه‌گه بۇ بزمه بیر تازه مسلمان ایسته‌ره‌م



بیر یئتیش فریادیمه، ای پادشاه-ی-کم سِپَه

زورق-ی-جیسمیم اوْلۇب مستغرق-ی-بحر-ی-گُنَه

گرچی صرّافم ذلیلم رو سییاه

عرصه‌ی-ی-محشرده سنده‌ن الده فرمان ایسته‌ره‌م
--------------------------
نام نوحه : زبانحال امام حسین (ع) در سر نعش حضرت علی اکبر(ع)


ای گـۆل کیمـی قانــه باتـان

اکبریم اوْیان، یاو‌ریـم اوْیـان

قــان ایچــره نــازیـلـه یـاتـان

اکبریم اوْیـان، یاو‌ریـم اوْیـان



خئیمه‌لره گلدی سسین

گلدیم اوْلام دادرسین

اؤلمه‌میسن وار نفسین

اکبریم اوْیـان، یاو‌ریـم اوْیـان



ای کشته‌ تیغ ستم

هئجرون ائدیب قدّیمی خم

گؤز‌لر یوْلۇن اهل حرم

اکبریم اوْیـان، یاوریـم اوْیـان



شام ائتمه لئیلا گۆنۆزین

چوْخ منتظر قوْیما گؤزین

ایندی هلاک ائیلر اؤزین

اکبریم اوْیـان، یاوریـم اوْیـان



ای سرو گۆل پیرهنیم

باغ بهشت و چمنیم

سنسیز گۆلۆم سوْلدی منیم

اکبریم اوْیـان، یاو‌ریـم اوْیـان



سن منه بیر یوْلداش ایدون

آغلار گؤزۆمده یاش ایدون

هم اوْغۇل هم قارداش ایدون

اکبریم اوْیـان، یاوریـم اوْیـان



توْپراقلارا قوْیما یۆزۆن

گل منه رحم ائیله اوزون

آچ بیرجه بو قانلو گوزون

اکبریم اوْیـان، یاوریـم اوْیـان



گلدیم جیگر داغلاماقا

اوْغۇل دئیوب آغلاماقا

گؤزلریوی باغلاماقا

اکبریم اوْیـان، یاو‌ریـم اوْیـان



قالمێش الیم اۆسته الیم

باشه یئتوب چون اَجلیم

صبر ائیله قوْی منده گلیم

اکبریم اوْیـان، یاو‌ریـم اوْیـان



تیغ جفا خامه کیمی

جسمون یازێب نامه کیمی

سنلن وارام شامه کیمی

اکبریم اوْیـان، یاو‌ریـم اوْیـان



صرّاف دینار غمم

نقّاد نقد اَلمم

بۇ سؤزده ثابت قدمم

اکبریم اوْیـان، یاوریـم اوْیـان

---------------------------
نام نوحه : در خصوص شهادت حضرت علی اکبر(ع)


یارالاندێم ای شه کربـلا

اؤلـۆرم هـراییمـه گـل بابا

اوْ گلـن قــدملــروه فــدا

اؤلۆرم هـراییمـه گــل بابا



یئتیشیب وجودیمه اوْخ زبس

داغێلێبدێ سینه باتێب نفس

بۇ نفسده وئر منه بیرجه سس

اؤلۆرم هـراییمـه گــل بابا



سنه چون یئتیوب چوْخ اذیّتیم

اوْدۇ چـوْخ وارێمدێ خجـالتیـم

بـــۇدۇر اوّل آخــــر زحـمتیــم

اؤلۆرم هـراییمـه گــل بابا



منی قصد ائدیبدی گلور اجل

بۇدی فکری درک ایده ال به ال

اوْ گلینجه سن باشێم اۆسته گل

اؤلۆرم هـراییمـه گــل بابا



بۇ گۆن ایستیسی بۇ جیگرده سوز

عطشیم دمادم ائد‌ر بروز

بدنیم یارالێ اؤزۆم سۇسۇز

اؤلۆرم هـراییمـه گــل بابا



بابا وِردی ذکریم اوْلۇب «تعال»

منی گل بۇ حالده یاده سال

باشێمێ گؤتۆر دیزین اۆسته آل

اؤلۆر‌م هـراییمـه گــل بابا



بد‌نیم یارالارێ قان وئریر

بۇ قان اؤزگه حالی نشان وئریر

بابا گل گؤر اوْغلۇوی جان وئریر

اؤلۆرم هـراییمـه گــل بابا



بابا ائیله اکبروه کرم

یوْلا گؤز تیکوب سنی گؤزلر‌م

باشێم اۆسته گلمسن اؤلمرم‌

اؤلۆرم هـراییمـه گــل بابا



گؤرۆب اهل کین بابا تک منی

یێخوب آتدان اؤلدۆره‌جک منی

گل آماندێ کؤلگه یه چک منی

اؤلۆرم هـراییمـه گــل بابا



بۇ حسین عزا‌سیدی یاز رضا

اؤزی بئیته بئیت وئرور جزا

بۇ سؤزی دوباره دئ دۇت عزا

اؤلۆرم هـراییمـه گــل بابا


----------------------------
نام نوحه : مناسبت شب عاشورا اثر : مرحوم صراف تبریزی


گل گلزار رسالت بو گئجه

شمردن ایستدی مهلت بو گئجه

بیر دویونجا باخا اکبر یوزینه

ائلیه آیه تلاوت بو گئجه

زینبون قلبینی آرام ائلیوب

اولا مشغول عبادت بو گئجه

یاتمیوب آل علی صبحه کیمی

شیعه یاتسون نئجه راحت بو گئجه

بولمورم نئلیدی بس تازه گلین

اونا یوز وئردی نه حالت بو گئجه

ام لیلایه بویوردی شه دین

سن ده وئر اوغلوا زینت بو گئجه

دوتدی دنیا یوزینی موج بلا

داشدی دریای مصیبت بو گئجه

کربلا ایچره اولوب محشر عیان

گوئیا قوپدی قیامت بو گئجه

باغلانوب سو یولی لب تشنه قالوب

عترت شاه ولایت بو گئجه

شهدالر آدینا کلک قضا

یازدی فرمان شهادت بو گئجه

-------------------------
اشعار عرفانی مرحوم صراف تبریزی

نام شعر : وصل

من ترک شراب لب یار ائیلدیم اولدی

زهر غم هجریله مدار ائیلدیم اولدی

ای شیخ بهشتی دئمه ترک ائیلییه ن اولماز

من ترک سر کوی نگار ائیله دیم اولدی

اؤز جانینی ترک ائیلیین اولماز من اؤزومدن

روحوم کیمی جانانی کنار ائیلدیم اولدی

ممکن دگی بیر محنته مین جان دؤزه اما

من جانیمی مین درده دچار ائیلدیم اولدی

دانسته و فهمیده خط و خاله ویریلدیم

اؤز اؤز گونومو تیره و تار ائیلدیم اولدی

هئچ کیمسه اؤزون خار و ذلیل ایسته مز اما

من اؤز اؤزومو دهرده خار ائیلدیم اولدی

عرفان نظربازی و رندی و ظریفی

عالمده خلاصه نه کی وار ائیلدیم اولدی

صرافه دئدیم حکمتیلن یوخ وار اولانماز

گولدی دئدی باخ گؤر یوخی وار ائیله دیم اولدی

----------------------
تب عشق


چشم سیه یار دل پیر ایلن اوینار

آهوی خطا دیدیه باخ شیر ایلن اوینار

سالمیش اوزه تک خالینی یاندیرسین حریفی

لیلاج دغل بازدی تدبیر ایلن اوینار

آئینه ده اؤز عکسینه یاریم اولوب عاشیق

صورتگره باخ چکدیگی تصویر ایلن اوینار

صبریم کسیلیر عُمر آزالیر محنتیم آرتار

فوج مژه تا غمزه، پی پیر ایلن اوینار

روحیم اوچار از بس کی سیزیلدار دلِ زاریم

مطرب کیمی دستگاه بم و زیر ایلن اوینار

اویناتماغا یوخ زولفون اگر اولما مکدّر

دیوانه اولان حلقه ی زنجیر ایلن اوینار

مستانه گؤزون اوینادا قاش، ائتمه ملامت

میخانه ده هر کیم قالا شمشیر ایلن اوینار

تؤک خنجر ناز ایله قیزیل قانیمی، دورما

صیاد هاچان توتدوغو نخجیر ایلن اوینار؟

چوخ ائیلمه پیچ و خم و دستاریله بازی

قورخام دیه لر فتنه دی تزویر ایلن اوینار

اوینار تب عشق ایله وجودوم گئجه گوندوز

صراف دی گویا غم اکسیر ایلن اوینار


---------------------------
وجودیم سر به سر تیترر


صبادان گول اوزونده سونبول زولفون اسَر تیترر

منیم صبریم تئلین خط باشی تک، ظالم کسر تیترر

گؤرنده پنجه مژگانیوی لرزان اولور کؤنلوم

بئله کیم چنگل شهبازا بیر تیهو دوشر تیترر

نئجه خنجر دمینده مرغ بسمل اضطراب ائیلر

منیم کؤنلوم قوشی سندن اؤتور اوندان بتر تیترر

نگارا محفل وصل ایچره تمکین ایستَسن مندن

مگر سن بولمیسن معشوقونا عاشق یئتر تیترر؟

سنی گؤرجک نولور توپراغا دوشسم، بی قرار اولسام

یئتنده شمع ایاغینا، سالار پروانه پر تیترر

اوجالسا آه سردیم، سیندیرار لعل لبین پوسته

اسنده رسمدور باد سحر گولبرگ تر تیترر

تنیم اینجلدی مو تک بیر سر مویونده بند اولدو

توکون ترپنسه ای جانا وجودیم سر به سر تیترر

گرک من تیتره یم، صراف تک تبدار عشق اولدوم

نئچون منبرده واعظ متصل سرسم دیر تیترر!

-------------------
شعله ی شمعه اؤزون رسمدی پروانه ویرار


او سر زولفووه مشّاطه، پری شانه ویرار

چوخ ستمگردی پریشانی پریشانه ویرار

گؤرورم قتلیمه آماده دی جلاد گؤزون

تُرک بد مست تک، ال خنجر برّانه ویرار

حلقه زولف گره گیری ده باغلاندی کؤنول

اؤز اؤزون گؤر نئجه زنجیره بو دیوانه ویرار

لوح رخساریوی دوتموش او خطا کار خطون

قویما بیگانه الین سیب زنخدانه ویرار

آلمیسان یانوه گؤردوم گئجه رؤیادا منی

اؤزوم اؤز بختیمی بوللم، بو یوخی یانه ویرار!

لبلرون فکری منه قوت دل اولسا نه عجب

طعنه یاقوت لبون لعل بدخشانه ویرار

شیخ صنعان کیمی هرکیمسه سنی گؤردی دئدی:

عاقبت رخنه بو ترسا بچه ایمانه ویرار

ناوک غمزون ایچر قانیمی ای قاشی کمان

چشم مستون کیمی مخموردو، پیمانه ویرار

یانارام آتش هجرانووه باک ائیلمرم

شعله ی شمعه اؤزون رسمدی پروانه ویرار

زاهدون کفرینه عشقیم وئری فتوای صریح

کافر عشقه باخون، طعنه مسلمانه ویرار!

وار امیدیم سالا صراف اله بیر سرمایه

سکه عشقی ز بس نقد دل و جانه ویرار

----------------------
هر کیمده عشق اولا ائده جک جیلوه حسن دوست


خلق ایچره وصل مجلسی نین گرچه آدی وار

اما فراق عالمی نین اؤزگه دادی وار

هر کیم اگر سؤال ائده بو سؤز فسانه دور

وئررم جواب اگر سؤزومه اعتمادی وار

روز وصال یاردا وار بیم هجر، لیک

چون صبحِ وصل، آیریلیغین بامدادی وار

چون هجره یار طالب اولور، وصله اهل عشق

واضحدی یار سئودیگی نین آیری دادی وار

هر کیمده عشق اولا ائده جک جیلوه حسن دوست

عشقین همیشه حوسنله بیر اتحادی وار

پیوسته بار غم چکرم چکمرم نفس

بیر عمردور بو کش مکشین امتدادی وار

من درد عشقی گیزلده بیلمم بو شهرده

سئیلِ سرشک چشم تریم تک منادی وار

مندن یوزین دولاندورو گر ایستیم باخام

اؤز کؤلگه مین ده یوخسا من ایلن عنادی وار

آنلار بیاز حوسن رخ یارده نه وار

هر کیمسه درس عشقده آز– چوخ سوادی وار

مجنون کیمی گرک دوشه صحرایه رسمدور

هر عاشقین کی دلبری لیلی نژادی وار

معشوقه جانون ایسته سه وئر، معتبردی چوخ

صراف نقد عشقی اله داد و ستادی وار
-----------------