شاعر:فخرالشعرای اهل بیت : مرحوم سیدرضا حسینی متخلص به  (سعدی زمان)
 
 نام نوحه :در آرزوی زیارت قبر حضرت امام حسین


اولموشام مدّتدی قبروندن حسین دور آغلارام

اؤلسم گلّـم اورکـده وار بو منظور آغلارام

هر کس اولدی دهرده بیر مه‌لقانون عاشقی

منده اولدوم بیر حسین بیر کربلانون عاشقی

رسمدور عاشق اولار نی ‌تک نوانون عاشقی

اولموشام سر پنجه عشقونده مقهور آغلارام

غصّه‌دن قانیله دولموش گؤگلومون پیمانه‌سی

اولموشام عشقونده من بیر نحویله غم خانه‌سی

آدیمـی سسلـر حسینیلـر حسیـن دیوانه‌سی

ایلیوب عشقون منی دیوانه مشهور آغلارام

من گدا سن بیرجه شاهنشاه گردون بارگاه

گیزلین عشقیـم وارسنه آگه‌سن ای سرّالاه

گر گدا شاهـه اولا عاشـق دگول شاها گناه

عشق جرم اولسا وارام جرمومده معذور آغلارام

من گنهکاری آقا درک ایتممیش پیک اجل

گوشه چشمیله بیـر لطف ایله ای صبح ازل

یا منی اِیسته گلیم یا جان‌ویرن وقتیمده گل

گورسون عزرائیل الیمده واردی منشور آغلارام

گر منـی ایتسـه مَخَیّـر کـردگار ذوالمنن

کربلانی ایستوسن یا روضه رضوانی سن

ایسترم کربوبلانـی نیلـورم فردوسی من
 
قبـروه قـالام مجاور تـا دم صور آغلارام

ایلورم بیر عمر دور شش‌گوشه قبرون آرزو

طوف ایدم قبرون قیلام اشگیله گردین شستشو

محشـره بـو خدمتیلـه اَخـذ ایدم بیـر آبرو

اولماسام بو خدمته ای‌شاه مأمور آغلارام

بیرده گورسیدیم اگر بالای سرده دورموشام

کاسه چشمی سرشگ چشمیله دولدورموشام

اکبـره پائیـن پــا ده بـزم ماتـم قورموشام

فاش ایدوب قویمام قالا بوعشق مستور آغلارام

رحـم ایلــه بـو بی‌پناهیـن دیـده گریانینه

قویما ممزوج اولسون اشگ حسرتی دل قانینه

گؤگلوم ایستور قبرووی آند اُولسون اکبرجانینه

یئتمسم وصله گوزومده واردی تا نور آغلارام

نیلیـوم یتمـور الیـم ای شهریــار مستظام

بوینی چگننده دوروب ویرّم اوزاقدان بیرسلام

السّلام ای جان‌ویرن کرب و بلاده تشنه‌کام

ایلـرم قبـرون مجسم زار و رنجور آغلارام

السّلام ای حق یولوندا جاه و عزّتدن گیچن

السّلام ای سو یرینه لخته لخته قان ایچن

السّلام ای اوز الیلـه اوغلونا خلعت بیچن

وصل اکبردن ایدن لیلانی مهجور آغلارام

السّلام ای سو ویرن قانی ‌بلا صحراسینه

السّلام ای آدی زینت هـر بلا طغراسنیه

السّلام ای غرق اولان کشتیسی قان دریاسینه

سالدی ساحلدن مخالفلر سنی دور آغلارام

السّلام ای ذات پاک کردگارین مظهری

السّلام ای لفظ ثاراللهین عالی مصدری

السّلام ای «وِتر مَوتورون» مترجم مضمری

قان ایدوب گوزیاشیمی بیر «وِتر مَوتور» آغلارام

السّلام ای سو کنارینده لب عطشان جان‌ویرن

السّلام ای قوملار اوسته جسمی بی‌غسل و کفن

السّلام ای نیزه‌ده گون تک‌ باشی شامه گیدن

یاد ایدوب احوالووی ای نَحْری منحور آغلارام

السّلام ای مَصْرعی قانیله دریا تک دولان

السّلام ای غسلی قانی توپراقی کافور اولان

السّلام ای نعشی اوسته زینبی زلفون یولان

زینب آدی آرتورور باشیمده مین شور آغلارام

مُلتجی دور بو «حسینی» یا حسین آگاهسن

بیر گدای رو سیه دورسن سَخی بیرشاهسن

ای «قَتیل العَبْره» اشگ چشمه خاطرخواهسن

ایستورم سنلن اولام محشرده محشور آغلارام
-------------------------

شاعر: سیدرضاحسینی (سعدی زمان)
 
نام نوحه :زبانحال حضرت زینب  به باد صبا  اثر : مرحوم حسینی
 
صبا حسینه ویر خبر قیزون رقیّه جان‌ویرور
سنون کفن سیز اُولماقون خرابه‌ده نشان‌ویرور
قیزون رقیّه جان‌‌ویرور
بابا بابـا دیــور یانـور ایـدور نظر صاقا صولا
یقین یولون گوزتلوری تیکوبدی چوخ گوزون یولا
بـو قـدر قویمـا گوزلـری یولونـدا انتظار اولا
نَوید وصلون اولساگر حیات جاودان ویرور
پوزوبدی حالی حالیمی گرک اؤلونجه دل یانا
اگر چـه نار غصّه‌دن یاخوندی قلبیم اودلانا
تمـام غصّـه بیریانـا ولـی بـو غصّـه بیریانا
قوری یئر اوسته بیله جان بو طفل ناتوان ویرور
حرملـرون باخـور یانـور آنـاسی اشگبار اولور
جنازه اوسته باش آچوب باجیسی ساچلارین یولور
قولونـدا قمچی یرلرین گورنده گوزلریم دولور
حُنوطی خاک غسلینی بو چشم خونفشان ویرور
نه وار سسیمه سس ویرن نه بیر نفر گلوب گیدن
گـوره بـالام غـریب اؤلور تدارک ایلیه کفن
ایدوم نه چاره نـه کمک نه وار هرایمه گلن
نه دیز گلور نه دل دوتور نه گوز یاشیم امان ویرور
حسین یارالی قلبیمون گل ایمدی یاره‌سین بِتور
قیزیـوی قبره قویماقا اؤزون بو منزله یئتور
منی سویوبلا باری سن اَلونده بیر کفن گتور
امیدی یوخدی بیرکسه باجون سنه گمان ویرور
وطن دگل بـو شهر شام اولا قبیلمـه قریب
جنازه‌سین گوتـورماقا گلـه قبیلـه و حبیب
بو اهل شهره نابَلَد اسیر شمر اوزوم غریب
غریبون اهل شهر اولان سسینه سس هاچان ویرور
نه فرش و نـه چراغ وار خرابه یئردی منزلی
نه سو و نه طعام وار نه سوز دیه دوتور دلی
باجون چتیندی حلّ ایده اؤلونجه بیله نسگلی
حجـاز عزیزی شامـده بـو ذلّتیله جـان ویرور
باخـان بولـر ملالیمی گوزومده قانلو یاشمه
باشیم اوجالیقی تؤکوب نه کول زمانه باشمه
نولوبدی بس منیم ائلیم نه گلدی آل هاشمه
صباح و شام دردسر بیزه بو شامیان ویرور
سُموم جور و ظلمیله خزان الوبدی گللرون
خـزان گُلینـه بنـزوری بو طفل ناز پَرورون
آجیندان عارضی سولوب سارالدی بو گل تَرون
بهـار عمر زینبـه بو غصّه‌لـر خزان ویرور
سـزادی بـو یتیمه‌نون فغانی کَوْنی دولدورا
اَجَلسیز اؤلدی اؤلدوروب بونی عدو وورا وورا
اولـوب ایاقـی آبلـه ایاقـه ایستـوری دورا
دورانـدا یاره یرلری ایاقلاریندا قان ویرور
حسینی بخت کوکبون دوشوب تزلزله سنون
ایدور محّب سرزنش بو حاله طَعنه دشمنون
نهـان مَلالـدن عیـان چیخار سپهره شیونون
حسینه آغلاسان خدا مرامووی اینان ویرور

---------------------

شاعر:حسینی

نام نوحه :خطاب جناب زینب به‌سر امام اثر مرحوم : حسینی
 
نیزده قارداش باشون ایلور تجلّا زینبه
گوسترور هر جلوه‌سیندن مین تسلّا زینبه
پرتـو انــور حقـدن نـوک نیزه‌ طوریدی
طورده موسانی حیرتده قویان بو نوریدی
لفظ «اَرنی»‌دن کلیمه نور حق منظوریدی
«لَن» تَـرانی سویلین اولموش هویدا زینبه
نیـزه‌ده باشـون گورن ای مظهـر حیّ وَدود
سویلوری عیسادی بو داره چکوب قوم یهود
شعلـه آهیلـه وورسا مشعل خورشیده دود
وار یری دُوردومجی گؤیدن باخسا عیسا زینبه
ای هـلالی زینبــون وی صـورتی بَدر تمام
ایله‌موشدون بو گیجه یوخسا کول اوستونده مقام
تازه آی تک گوسترولّر بیر بیرینه خاصّ و عام
باشـووه خلـق ایلـور ایما باشون ایما زینبه
تئـز گلیـدون پیشـوازه سـن گرک قالـدون گیجه
قالموشـام حیرتـده من بولمم گونـوزدور یا گیجه
گون ندور اولسا گیجه گوندوزدور آی چیخموش نیجه
اولساگر گوندوز ایدوب غم لیل یَلدا زینبه
ای هدایـت اهلینـه مصبـاح ذات ذوالمِنَن
نـه دیوم نـه چکموشم شام غریبانوندا من
روشن ایتموشدون گیجه خلوتگه اغیاری سن
بیر قرانلوق خیمه اولموشدی مصلّا زینبه
ای جمـال اللّهـه مَظهـر وجهی وجه باقیه
میندیروب عشقون منی قول باغلو عریان ناقیه
عشق اولا بـو باده عشقی ایچوردن ساقیه
ایله مست ایلوب گلور غملر گوارا زینبه
ایمدی تبلیغات ایدوردوم خلقه اصل مذهبی
تاسسون گلدی گلوگیر ایتدی غصّه زینبی
سن دانیش زینب دلون قربانی آندور مطلبی
خارجی آد قویماسون بو قوم اعدا زینبه
ایله محـو ایتـدون منی بیر جلوه دیدارده
اوزلوقومدان خارج ایتدون مجمع اغیارده
باشون آردینجـا دولانّـام کوچه و بازارده
عالم عشقونده خوشدور هر بلایا زینبه
هاشمیّانـه آچوبـلار ظلم اَلین اهل جفا
گه دوگولّر قیزلارون گاهی دیولّر ناسزا
بیر نفر یوخ دادرس ناچار ایدولّر اِلتجا
گـه رقیّـه گـه سکینـه گـاه لیـلا زینبه
فکریمه ایتمزدی هیچ بو ماجرا قارداش خُطور
سن اؤلرسن زینبین باغلار قولون قوم شَرور
ایلـر اهـل کوفـه‌دن بـو پایه‌ده کینه ظهور
کف چالالار طعن ایدلّر دُخت‌زهرا زینبه
زینبون دیندیرمسن دیندیرمه قوی پژمرده حال
اوز قیزوندور فاطمه باری دانیشدیر گوگلون آل
آز قالور قلبین اریتسون غصّه ایتسون ارتحال
بو صغیره دردی اولسون درد عُظمی زینبه
ایتمورم یالقـوز مـنِ بیخانمان نی‌‌تک نوا
هاردا بیر اوغلی اؤلَن وار دلشکسته بینوا
ییِغمیشام اطرافیمه منلن اولوبلار همصدا
آغلیاندا سس ویرور بیر دسته ثَکلا زینبه
ایلین گونلـر آتـام حیدر خلافت کوفه‌ده
خدمتیم اولموشدی اهل شهره عادت کوفه‌ده
ایمدی ایلولّر منه قارداش شماتت کوفه‌ده
تنگ اولوبدور چشم سوزن‌تک بو دنیا زینبه
ظاهـراً گــر چـه اسیرم دستگیرم بیقرار
باطناً امّا خوشام چون ‌وار رضای کردگار
صورت مکشوفه‌لـرده معنـی تـوحیدوار
بو اسـارت گوستـرور صورتده معنا زینبه
ای حسینی چوخ مقدّسدور بو زینب ساحَتی
غصّه‌دن مین ایل گیچوب عمرونده هر بیر ساعتی
هر کیمون اولسا بیوک دردی چتین بیر حاجتی
صـدق اوزیله یا حسینه آغلاسون یا زینبه

-------------------------
شاعر:حسینی

نام نوحه : زبانحال حضرت زینب در کوفه اثر : مرحوم حسینی
 
گیرنده کوفیه زینب باخوب جدا باشینا
دییـردی درد دلین اؤز یارالی قارداشینا
گلوبدی نیزده قانلو باشین دیله قارداش
کلام حقـی اوخـور اهل باطله قارداش
دوباره یاره ووروبلار آخار باشون قانی
یانار بلالی باجون بیله نیسگیله قارداش
اوقان دولان گوزون آچ دربدر عیالووه باخ
ووروبدی بوینوموزا شمر سلسله قارداش
بلالی باشوین عشقـی سالوب بلایه منی
بو حال زاریمی بیرکیمسه یوخ بوله قارداش
اوقدر قمچی ووروب شمر قوللاریم گووروب
بو غملریله باجون اؤلمیوب هله قارداش
باشمیدان آلدیلا غارت گونونده معجریمی
ائدوم نچـاره‌کی محتاجم حائله قارداش
ندن سوروشموسان احوالینی بوخون‌جگرین
باجونی هاردا گوزوندن سالار بیله قارداش
سینیق کجاوه‌ده باش آچوخ بازاری گزورم
بو بخت قـاره‌ده بـاخ بیر تحمله قارداش
بـو اهـل کوفه تصدق ویرولّه قیـزلارووا
دوشوبدی عترتوون امری مشگله قارداش
حسینـی زینب کبـری دیلینجـه یاز بیرده
گلوبدی نیزه‌ده قانلو باشون دیله قارداش

----------------------------

شاعر: حسینی

نام نوحه : زبانحال حضرت زینب در وداع با امام اثر : مرحوم حسینی

 
گل بیر دولانوم باشووه گیت تاجداری زینبون
قربان گیـدن یولاّریـوه جانِ فکاری زینبون
هر یاندان اوز امّیدیمی کسدیم بوگون من بینوا
بو چولده گوز تیکدیم سنه ای ماسوی‌اللّهه رَجا
سنده گیدورسن بس نئجه تاب ایلیوم ایئتموم نوا
یوخ یدّی قارداشدان قالان بیر غمگساری زینبون
باغریم حسین قان باغلیوب وار محضرونده چوخ سؤزوم
امّا دیلیم دوتمـور دییم مأیوسم عمرومدن اوزوم
غصّه گلوگیر ایلیوب ویرمـور امان آغلار گوزوم
وار حقّی گوزدن خون دل گرایئسته جاری زینبون
تاپشوردون اطفالون منه ای قُطب افلاک و سمک
یالقوز بیر عورت نیلسون قرخ مین قوشون یوخ بیرکمک
چکمـور گریبانیمـدن ال هشتــاده‌دین قـاره لچک
گلمور اجل تا گورمسون بو گیروداری زینبون
باشدان آتـام حیدرکیمی قانون آخور گوز قاشیوه
باغریم اوقان تک قان اولوب آند اولسون اول گوز یاشیوه
گلمور دیزیم بیر آز دایان زینب دولانسون باشوه
نه دیزده نه دلده حسین وار اختیاری زینبون
گیتمه بویون قربانی دور قول بوینووا بیرده سالوم
باس قانلو باشون سینمه تا جدّیمون عطرین آلوم
روحیم امیدیم عزّتیم گل قویما قارداشسیز قالوم
سن اولماسان اولماز یقین عزّ و وقاری زینبون
قیزلار باخوردی خیمه‌ده ممکن دگولدی کشف راز
یوخ بوردا ایمدی اهلبیت ای خسرو ملک حجاز
وار دلده بیر گیزلین سوزوم عرض ایئتماقا قیلسان مُجاز
عرض ایلرم ای روحیدن آرتوخ نگاری زینبون  
سویله گوروم گورماقلوقا بیرده گلورسن عترتون
قویدون پریشان یا باجون زلفی کیمی جمعیّتون
آخـر سفـردور بوسفـر اولمـاز دوباره رَجعتون
عمرونجـه قلبینـده قالار بـو انتظاری زینبون
ایئتدی اشـاره باشیله یعنـی باجی باخ نیزه‌یه
باشیم کسیلسون آز قالور گلسون فلکلر لرزیه
ذات خـدا ایتسـون بپـا عرشینده بـزم تعزیه
اولسون او بَزمه منعکس تا آه زاری زینبون
زینب ایئشیتجک بو سؤزی باش آچدی گلدی شیونه
عرض ایلدی قارداش حسین بیر خواهشیم واردور سنه
تک‌تک وداع ایئتدون هامی اطفالی تاپشوردون منه
بو فیضـدن قالدی ایکی لاله عُذاری زینبون
ایله عطش دلدن سالوب قالموب اولاردا صبر و تاب
غشّ ایلیوبلـر خیمـه‌ده ای نـور چشـم بوتراب
گُل یوزلرینه سپماقا یوخ خیمه‌ده هـر چند آب
اشگیلـه امّـا دیـده‌ده وار جویبـاری زینبون
ایله تواضع گل اوزون گور اول ایکی نورس گلی
تا دللرینـده قالمـاسون حالـه گلنـده نسگلی
القصّـه گَتـدی خیمیــه زینب شـه دریـادلی
حالی پوزولدی قارداشین گیئتدی قراری زینبون
گوردی یوز اوسته قول بویون بیرجفت مه منظر یاتوب
اشگیله توپراق ایسلانوب یوز گوز قرا تللّر باتوب
گورجک بوحالی شاه‌دین اؤز فکرینی باشدان آتوب
گور زلفی چوخ آشفته‌دور یا روزگاری زینبون
دوتقـون سسیلـه ایلیـوب زهـرا قیزی اوّل ندا
گوردی اویانمولاّر اولار بولدی که وار بیر ماجرا
تا اَل یتوردی قووزاسون گوردی اولوبلر یوخ صدا
ویران اولوبدور صبردن محکم حِصاری زینبون
باخ گور بو درد و محنته داش اولسا دل ایلر دوام
واللّهـی بیـر زینب دؤزر بیــرده امام تشنه کام
ذیحقّدور قان آغلاسا صاحب‌زمان هر صبح و شام
اولسون نقدری آلمیوب داد اشگباری زینبون
ایستردی آیریلسون حسین زینبدن آغلاردی گؤزی
ویرّم قسم اول‌وقتینه بیر سن بولورسن بیر اؤزی
قورتار فشـار دهردن لطفاً قبول ایئت بوسؤزی
مخلوقه محتاج ایئتمه ای پروردگاری زینبون

-------------------------------
نام نوحه : حضرت ابوالفضل  اثر : مرحوم سیدرضاحسینی(سعدی زمان):
 
من ابوالفضله‌م جماعه‌ت، شؤهره‌تیم دۆتمۆش جاهانێ
قودره‌ت-وْ-آللاه اوْغلۇیام من، حیدر-ی-کررار-ی-ثانی

یادیگار-ی-نامدار-ی-غازی-ی-بدر-وْ-حنینم
حیدر-ی-کررار آتامدێر، مرتضی‌یه نور-ی-عئینه‌م
هم سپه‌هسالار-ی-لئشگه‌ر، هم علمدار-ی-حۆسئینه‌م
ائیله‌ره‌م ظاهیر بۇ چؤلده، صوله‌ت-ی-شیر-ی-خۇدانی

دیلده یوْخ بیر ذره باکیم، گر دۆتا دونیانێ دۆشمه‌ن
اؤلدۆ گرچه آل-ی-هاشیم، اوْلمایێن اؤلمه‌کده‌ن ایمه‌ن
قوْیمارام جوْنبه‌نده سیزده‌ن تیغ-ی-قهرآمێزێله من
چرخ-ی-اطله‌س گؤرسه تیتره‌ر، بۇ حیسام-ی-جانسیتانێ

مجلیس-ی-شۇرای-ی-جنگین، صاحیب-ی-اۇره‌نگییه‌م من
لئشگه‌ر-ی-شاه-ی-حیجازێن، باهۆنه‌ر سرهنگییه‌م من
بۇ کؤمه‌کسیز پادشاهێن چۆن وزیر-ی-جنگییه‌م من
وئرسه رۆخصه‌ت ائیله‌ره‌م بۇ عاله‌م-ی-ایمکانی فانی

گر ائده‌م دعوایه ایقدام، ائی گوروه-ی-پست فیطره‌ت
قوْیمارام قالسێن بۇ چؤلده بیر نفه‌ر سیزده‌ن سلامه‌ت
گئچمه‌ک امما باش-وْ-جاندان، چۆن وظیفه‌مدیر جماعه‌ت
قانێمیله ئینه وئرره‌م، بیر حیات-ی-جاوێدانێ

بیشه‌ی-ی-هیجاده شیره‌م، قاف-ی-رزم عنقاسییه‌م من
هر فونون-ی-جنگ-وْ-جنگی ایشله‌رین داراسێیه‌م من
عیتره‌ت-ی-شیر-ی-خۇدانێن، تئشنه لب سققاسێیه‌م من
نهر-علقه‌مده‌ن خییامه، باغلارام آب-ی-روانی

خئیمه‌ده آغلێر سۇسۇزدان، عیتره‌ت-ی-شاه-ی-مدینه
العه‌طه‌ش فریادی یئرده‌ن، اوْوج ائدیر عرش-ی-برینه
چیگنیمه سالدێ گله‌نده، بۇ قۇرۇ مشکی سکینه
ائیله‌دی سۇ ایلتیماسێ، بیر منه گلدی گۆمانێ

بۇ حۆسئینی کی سیپاهێن، ائیله‌ییب‌سیز قانا غلطان
جان-ی-زهرادێر جماعه‌ت، هم ایمام-ی-کوْون-ی-ایمکان
حجت‌الله بیلمیسیز گر، فرض ائدین سیز بیر مۆسه‌لمان
قوْیمایێن یانسێن سۇسۇزدان، عیتره‌ت-ی-بی‌خانێمانێ

ائیله‌دی ایتمام-ی-حجت، لئشگه‌ره هر چند اوْ سروه‌ر
اوْلمادێ اصله‌ن مؤثر، گلمه‌دی رحمه اوْ لئشگه‌ر
بیر نفه‌ر سسله‌ندی امما، کئی هۆنه‌روه‌ر پۇر-ی-حیدر
ائیله‌مه سۇ اۆسته بیجا، سن ملامه‌ت شامییانی

گر ایکی ایشده‌‌ن بۇ چؤلده، اوْلمایا بیر امره مجرا
یئر یۆزین دوْلدۇرسا دریا، وئرمه‌ریک بیر قطره اصلا
یا گره‌ک قارداشێن اوْلسۇن، بئیعه‌ته دیلده‌ن موهه‌ییا
یا بۇ تشکیلاتێ پوْزسۇن، تیغ قیلسین حؤکمرانی

جنگ عباسی گؤره‌نده، قۇدسییان گلدی نوایه
سس سسه وئردی مله‌کله‌ر، عرض قێلدێ مرتضی‌یه
ائیلیری عباس دعوا، یا علی باخ کربلایه
گؤسته‌ریر اوْغلۇن حۆسئینه، گؤر نه نؤوعی جانفیشانی

بیر رشاده‌ت، بیر شجاعه‌ت، گؤسته‌ریب اوْل تئشنه سققا
عرصه تنگ اوْلدۇ سیپاهه، سێندێ صفله‌ر قاچدێ اعدا
آلدێ تا نهر-ی-فراتی فارئس-ی-مئیدان-هیجا
بئیره‌قین نهر اۆسته وۇردۇ، اوْل وفا-وْ-مئهر کانی

لئشگه‌ره سس دۆشدۆ آلدێ، نهری بۇ یالقۇز علمدار
خئیمه ده ناگه ائشیتدی، بۇ سسی تئشنه اۇشاقلار
خێرداجا قێزلار سئویندی، داده گلدی آل-ی-اطهار
باشێنا یێغدێ سکینه، عیتره‌ت-ی-آل-ی-عبانی

اللـه‌رینده بوْش سۇ جامێ، گلدیله‌ر داده نوایه
یۆز دوْلاندێردێ خانێملار، بارگاه-ی-کئبرییایه
عرض ائدیبله‌ر بارائلاها، حافیظ اوْل صاحێب لوایه
حفظ قێل شر-ی-عدۇده‌ن، یادیگار-ی-مرتضی‌نی

...
اوْل قده‌ر گئچمیب، حۆسئینین گۆل کیمی رنگی سارالدێ
سسله‌نیب وای قارداشێم وای، زینب‌ین آرامێن آلدێ
یعنی عباسێن سۇ اۆسته، قوْللارێن شام اهلی سالدێ
اوْخلانێب سۇ مشگی گئتدی، طاقه‌ت-وْ-تاب-وْ-توانی

------------------------------

شعرترکی :در باره شهادت امام صادق از مرحوم سیدرضا حسینی متخلص به( سعدی زمان)اهل تبریز:

حسین ذکرینه گوگلوم اگرچه شایقدور
ولی بو یرده خیالیم امام صادقدور
بلا بو رسمیدی اهل ولادن آیریلماز
اودور امام همیشه بلادن آیریلماز
دیوب بلایه بَلی یکسر عترت یاسین
خلا کلامیدی چون سینی یادن آیریلماز
بلا و محنت اسیری امام صادقه باخ
دوزر بلایه غم و ابتلادن آیریلماز
ایدوب او سروری خانه نشین بنی عبّاس
تقیّه محنتی اول مقتدادن آیریلماز
قویِیدیلر قالا آسوده کاش خانه نشین
گوروردولر که نماز و دعادن آیریلماز
جفا و جوریده منصور قویمادی نقصان
جهاندا رسمیدی ظالم جفادن آیریلماز
ایدوبدی صادق آل محمّدی مسموم
هوای مُلکی اولان بد هوادن آیریلماز
امام او زهریله اوز جدّینه اولوب ملحق
وصیّ ختم رسل مصطفادن آیریلماز
وصیّت ایتمیشیدی اوغلی ایتدی غسل و کفن
عمل وصیّته اول پیشوادن آیریلماز
جوار امام باقرده دفن ایدوب آتاسین
بالا محبّتینه باخ آتادن آیریلماز
بقیعیدن قلمیم کربلا اییی آلوری
بو قان اولان اورگیم کربلادن آیریلماز
اولوم حسینون او شش گوشه قبرینه قربان
حسین ده اکبر گُلگون قبادن آیریلماز
بیله گمان ایدورم ایمدیده یارالی باشین
آلوب دیز اوستونه اول مه لقادن آیریلماز
یارا چتیندی اگر اولسا گوز قاباقینده
بو غم او خامس آل عبادن آیریلماز
باخاندا ایمدیده سسلر جوان اوغول ایوای
حسین ''حسینی'' بو آه و نوادن آیریلماز
-----------------------------------
 نوحه در جلالت امام رضا:از مرحوم سیدرضا حسینی متخلص به (سعدی زمان)

اهل تبریز:
قربان اولوم جلالتیوه یا ابا الحسن
چوخ شائقم زیارتیوه یا ابا الحسن
مین بیر آدیله آدلانوب ا... لایَنام
اسم رضادی مظهری بو آدلاری تمام
ای اسمی اسم اعظم حق، ای شه اَنام
عاجزدی عقل مدحتیوه یا ابا الحسن
دنیانین اهلی رسمیدی یوخ شبهه و مقال
شیرین آدی گَلنده عسلدن وورار مثال
شیرین دور اهل عشقه عَسَلدن ولی وصال
قربان اولوم حضرتیوه یا ابا الحسن
تلخین مثالینی عُقلا زهریدن وورار
عُشّاق ایچینده عکسینه امّا عقیده وار
مین دفعه زهریدن آجیراقدور فراق یار
یوخ منده تاب فرقتیوه یا ابا الحسن
آگاهیسن اوزون سن اَیا شاهِ ذوالکرم
من عاشقم سنه، دیمه مدّاح و نوکرم
بیر آستانون اوپماقی مین خُلده ویرمرم
آند اولسون اوز امامتیوه یا ابا الحسن
بیگانه بُلمز عشق غمین، آشنا بُلر
گیزلین رموزی عالم جهر و خفا بُلر
قلبیم نجه یانور بیر اوزون بیر خدا بُلر
دل تشنه دور سقایتیوه یا ابا الحسن
سن مظهر جمال خدای عطوف سن
کَشّافِ هَمّ و غمّ و کُروب و لهوف سن
معروف سن بو اسمه امام رئوف سن
جانلار فدا عطوفتیوه یا ابا الحسن
چوخدان دوشوبدی خسته گوگل اشتیاقیوه
یاندورما بیر بیله منی نارِ فراقیوه
ایسته گَلوم بهشتیدن اعلی رواقیوه
ویرّم قسم رضایتیوه یا ابا الحسن
ای شاه مُلکِ سِلم و رِضا، اَیُّهَا الرِّضا
نومید اولا گدای درون اولماسان رضا
باخ گور روادی ای شه اقلیمِ اِرتِضی
من گَلمیوم زیارتیوه یا ابا الحسن؟
سن شاه ماسِوا، سنه من کمترین گدا
شاهه گدانی بوش یولا سالماق دگُل روا
بیر باخماقون ایدر ایکی دنیامه اکتفا
اولّام رَهین منّتیوه یا ابا الحسن
قبروندن اوتری گوگلوم اَسور مثل برگ بید
بیر سائلم قاپوندا سیه روی و مو سفید
ویرّم قسم جوان بالاوا ایتمه ناامید
قیل مفتخر عنایتیوه یا ابا الحسن
هجرونه گوز یاشیم قاریشوب قلب قانینه
رحم ایله بو بلا کشین آه و فغانینه
ویرّم قسم شَها سنی معصومه جانینه
ایسته گَلوم زیارتیوه یا ابا الحسن
ای جود و بخشش و کرم و فضل معدنی
اوغلون جواد جانینه ویرّم قسم سنی
بیرده قوناق چاقور او گوزل قبریوه منی
مشمول قیل کرامتیوه یا ابا الحسن
دلدن آلوبدی طاقتیمی درد فرقتون
نیلوم نصیب اولموری فیض زیارتون
هر صبح و شام یاد ایدرم حال غربتون
یانّام ملال غربتیوه یا ابا الحسن
فریاد و داد او وقتیدن ای خسرو حجاز
مسموم ایلدی سنی مامون حیله ساز
بو فکریله که ایلیه بیر نوع سِترِ راز
گَلدی سنون عیادتیوه یا ابا الحسن
گوز یاشلی عرض ایدردی که ای شاه محتشم
بو بَس دگُل فراقون اولور مایه ی اَلَم
طوس اهلی ایلوری منی بو امره متّهم
مه عاملم شهادتیوه یا ابا الحسن
مامون اگرچه قاتلیدی ای شه کِبار
امّا حیالیدور گنه اول شوم کین شعار
اوز ایتدیقی خطاسینه ایلردی اعتذار
آغلاردی حال رحلتیوه یا ابا الحسن
امّا نه بی مروّتیمیش شمر بیحیا
جدّون حسینین ایتدی بدندن باشین جدا
ووردی باشین جدایه همان غملی ماجرا
اولدی سبب مصیبتیوه یا ابا الحسن
من نوکرم قاپوزدا، حسینی دی شهرتیم
لایق دگُل اگرچه بو درباره خدمتیم
امّا بو بوش اَلیله گنه یوخدی وحشتیم
گوز تیکمیشم شفاعتیوه یا ابا الحسن
جدّون اوزی بیله بویوروبدی مفضّله
قرآندی اصل مدرکی، روشندی مسئله
واللهی قبریدن دوراجاقدی گُله گُله
قائل اولان ولایتیوه یا ابا الحسن

اشعار ترکی مرحوم سیدرضا حسینی متخلص به (سعدی زمان)اهل تبریز:
شعرترکی در مدح امام رضا(ع):
ای ایدن خراسانی کربلا هر غمه رضا یا ابالحسن
جدی تک قوری یرده جان ویرن قبریوه فدا یا ابالحسن
سیزوسوز آفرینندیه اولان آفرینش عالمه غرض
جوهر وجود اهل عالمه هر ایکی جهان نوروزه عَرَض
رشک خلد اعلی ضریحیوی گر بهشتیله ایلسم عوض
غبن دور منه بو معامله قیلام ادعا یا ابالحسن
بیر امیدیله دوتموشام سنون ای کرامتین کانی دامنون
ال گوتورمرم ایتمسن کرم ال منیم اماندور اتک سنون
آستانون ایله وسیعدور اولمیوبدی مایوس دشمنون
نا امید اولا بو محبّلر گور اولور روا یا ابالحسن
آستانوزه یوز قویار سیزون آرزوسینون گلشنی سولان
ذیل لطفوزه اعتصام ایدر قلبی غصه دن قانیله دولان
باب رحمتوزدن گورونمیوب سیّدی سیزون ناامید اولان
ایلیوب سیزی حیّ لم یزل معدن عطا یا ابالحسن
ای هامی ایاقدان دوشنلرین دستگیری یا ثامن الحجج
سایه عنایتده ساخلا بو مستجیری یا ثامن الحجج
قوماز آستاندان کریملر کلب پیری یا ثامن الحجج
بیر قوجا قولام باشیم اوسته سال سایه ی هما یا ابالحسن
خانه زاد بیر مادحم سیزه درگهونده بیر کمترین غلام
نیلیوم که مولامه عاشقم گرچه من سیه روی بیر قولام
درد عشق ایاقدان سالوب منی گَلمیشم طبیبیم دوا آلام
جرمدور مگر عاشق اولسا گر شاهه بیر گدا یا ابالحسن
وار مگر گدانون تناسبی سن کیمی جلالتلی شاهیله
گل دیسن گلر گیت دیسن گیدر دل شکسته حال تباهیله
جانیوه قسم ایله سن منه بیر نظاره نیمه نگاهیله
هر ایکی جهان دردیمه منیم ایلر اکتفا یا ابالحسن
سن یترسن اوچ یرده دادینه قبریوی زیارت ایدنلرین
بیر هامی دوراندا مزاریدن بارماقی دوداقیندا دلغمین
بیرده پخش اولاندا عمللرین نامه سی که بیر وقتدور چتین
بیر لَدَی الصِّراط اللرین دوتوب ایلسن رها یا ابالحسن
سگّیزیمجی شرطی موحّدین سنسن ای هامی عالمه رجا
من غریب و بی یار و یاورم یوخ منه اولان کیمسه ملتجا
بو غریبه بیر لطفیله نظر ایلسن اگر چوخ اولور به جا
ای غریق بحر مصائبه یار و ناخدا یا ابالحسن
ای غزال وحشی دلین بُلن من اسیر آلام و بی کسم
یوخ دلیم ایدم دردیمی بیان قویما سندن امیدیمی کَسَم
ویرّم ای امید جهانیان فاطمه آنان حقینه قسم
سن آقالیقون ایله باخما وار منده چوخ خطا یا ابالحسن
قاره پوش ایدوبلر ضریحیوی چون شهادتوندور سنون شها
وا رضا سسی شهری دولدوروب مشهدی دوتوب شیون و نوا
شیعه لر وورور باشه آغلوری کربلا بساطی اولوب به پا
طوس اولوب بو داد و نوائیله دشت نینوا یا ابالحسن
میهماندی بو سعدیّ زمان اوز قوناقیوه بیر نوازش ایت
بو یوزی قرا نوکرونله گَل مهریله عطوفتله سازش ایت
من حسینیم مادحم سیزه منکر و نکیره سفارش ایت
ایتمسونله مدّاح حضرتون قهریله ندا یا ابالحسن
 
-------------------------------
شعر ترکی : میلاد امام رضا (ع):از مرحوم سیدرضا حسینی متخلص به (سعدی زمان):


ای نسیم صبحدم مُردم ز درد اشتیاق
رو به خاک طوس یعنی قبله گاه نُه رواق
بوسه زن بر آستان قدس و آن گه عرضه دار
ای به قربان سگان کوی تو طال الفراق
ویردی باش چرخ امامتدن بو گون شمسُ الشّموس
قیلدی آفاقی منوّر طلعت سلطان طوس
اون ایکی تعیین اولوب قرآندا تعداد شهور
دوردینی شهر الحرام ایلوب خداوند غفور
یعنی حجّت اون ایکی، دوردی علی، مشکات نور
بو اوچومجی بیر علی دینه تولّاسی رئوس
قدحیدور مدحینده عرض ایتسم جمالی ماهیدور
گون بو خورشیدین هواسینده غبار راهیدور
سرّی سرُّ ا...دور، وجهی جمالَُ ا...دور
پرده ی صبح ازلده نور آلوب بوندان عکوس
یوخ صفات و ذات حقّه فارق و فاصل نکات
ذاتی نور پاک حق، آئینه ی اوصاف و ذات
بحر قدرت، لنگر خلقتدی، کشتی نجات
ناخدای فُلک دین هنگام طوفان شئوس
خسف ایدر یر اهلینی انسان کامل اولماسا
گوگ دایانماز بی ستون، معصوم حایل اولماسا
درک ایدر بو مطلبی هر کیمسه جاهل اولماسا
عالمه سائِسدی حجّت، حجّته عالم مَسوس
قلبه ی هفتم، امام هشتمِ اهل یقین
کلمه ی توحیده سگّیزمینجی شرط و اصل دین
کم ترین جاروب کش دربارینه روح الامین
آستانین اوپماقا حسرتده چرخ آبنوس
تا حجابات حریمی رفع ا... ایلدی
رشک طور آفاقی اوز نوریله ناگاه ایلدی
لَن ترانی سرّینه موسانی آگاه ایلدی
اولدی بو طوره کلیم عشقِ ‌ارواح و نفوس
قطب امکان، روح ایماندور، ولیّ ذوالجلال
دفتر ایجادیده دیباچه ی فضل و کمال
نیّر شان عظیمی گورمیوب گورمز زوال
گرچه خورشیدی زواله سوق ایدر لیل عبوس
نقل ایدوب نصّ پیمبردن ائمّه بیر بیره
ایستیسن ا... لقاسین ضاحکه مستبشره
بو شهین اولسون تولّا نقطه سینده دایره
اولمیان بو نقطیه پرگار ایدر آه و فسوس
حیف اولا بو شانیله غربتده چکدی چوخ بلا
ایلدی مامون نه جدّیندن نه زهرادن حیا
ویردی شاه اولیایه ظلمیله زهر جفا
ایلسون غصب ایتدیقی مسندده تا راحت جلوس
بُلمدی ایچسه شهادت جامی شاه دین رضا
گیسته دنیادن شهنشاه سریر ارتضی
قویماز آسوده امامین قاتلین امر قضا
گون به گون محصور ایلر کوکب بختین نحوس
تا سُرور سینه ی زهرانی مسموم ایلدی
کون و امکانی باتوردی یاسه مغموم ایلدی
کربلا مظلومی تک بو شاهی مظلوم ایلدی
یر قرا گییدی بو غمدن، گوگ لباس سند روس
ایتدیقی ننگین عملدن نادم اولدی اول دَنی
گَلدی گوردی جان ویرور رحم و مروّت معدنی
باشین آلدی دامنه عرض ایتدی یا مولا منی
قتله ایلور متّهم اسلام و ترسا و مجوس
بُلمورم من اوز عم اوغلوم حالینه قان آغلیوم؟
یا بو خلقین تهمتیندن ایلوم افغان آغلیوم
یا فراقوندان سنون عمریمجه هر آن آغلیوم
سنسیز اولدی گون گوزیمده تار یا شمسُ الشّموس
آه یابالعسکری، ای شهریار ماسوا
گرچه قاتلدور گنه ماموندا وار شرم و حیا
کربلاده ایتمدی امّا حیا شمر دغا
جدّیوی اُلدوردی چالدوردی مباهاتیله کوس
تک نه جان یاره شهید عشق تقدیم ایلدی
اهل بیتینده بو یولدا ظلمه تسلیم ایلدی
بیر وفا درسی هامی عشّاقه تعلیم ایلدی
صفحه ی عالمده کُهنلدی تعالیم و دروس
من که مشهور اولموشام عالمده سعدیّ زمان
کاش مشهور اولمیِیدیم ای شه عرش آستان
فضل بازارینده یوخدور مشتریدن بیر نشان
گنج علمین ارزشی یوخدور بو دوره بیر فلوس
رهرو عشقم اوز عشقیم گوسترن آئینیله
دلخوشام فرهاد تک بیر صحبت شیرینیله
ایتمرم شاها عوش مین بوس حور العینیله
آستانون توپراقین ایتماقلیقین بیر دفعه بوس
-----------------------------------
شعر ترکی :در باره خطاب به زمین مقدس طوس از سیدرضا حسینی متخلص به (سعدی زمان)اهل تبریز:
ای ارض طوس سنده عجب دلربا یاتوب
مرآت حق نما و جمال خدا یاتوب
بی اختیار مایل اولور دل وصالوه
سنده مگر بو کاه دله کهربا یاتوب
بالفرض روح شکّر اولا، سن بنفشه سن
ارواحی سنده جذب ایلین بیر قوا یاتوب
سن سن عیار مسلّم و مومن لره محک
سنده عیار کامل اهل هدا یاتوب
ایلر زیارتون مس ایمانی صاف زر
بیر بوته سن که سنده گوزل کیمیا یاتوب
شمس الشّموس سنده دور ای مفخر فلک
سنده مهیله مهره ویرن انجلا یاتوب
اسلامیده عزیزدی سنده یاتان وجود
سن سن او یر که سنده امام رضا یاتوب
پیغمبرین عزیزی، جگر گوشه سی رضا
باب الحوائج اوغلی قضایه رضا گلوب
سینای واقعیدی سناباد ارض طوس
سنده کلیم لم یزله مقتدا یاتوب
موسایه طوریده اولان انوار آشکار
سنده جفا الیله تاپوبدور خفا یاتوب
ای عرشدن گوزل یر، اوزی فرش زینتی
سنده سلیل پاک شه هَل اَتی یاتوب
بیر روضه سن ریاض بهشت بریندن
یوخ یوخ بهشتیده سنده جلالت فزا یاتوب
افلاکیان چکه لّه تمام اشتیاقیوی
سنده حبیب خالق ارض و سما یاتوب
دریای علم و حکمت بحر کمال و فضل
سن سن نه چون که سنده دُر پربها یاتوب
ای گوهر یگانه ی پیغمبره صدف
سنده سرور سینه ی خیرالنّسا یاتوب
سن بیر رئوف امامی آلوبسان کناریوه
اسلامیانه سنده امید و رجا یاتوب
سنده جگرلری یارالی بیر بزرگوار
اوز ایل قبیله سیندن اولوبدور جدا یاتوب
یرلرده یوخدی بیر یر اولا شانیوه نظیر
الّا او یر که اوردا شه کربلا یاتوب
بیر گل وار اوردا بلبلی ارواح انبیا
امّا یارالیوب اونی خار جفا یاتوب
عرش خدا چکر او یرین اشتیاقینی
چون اوردا گوشواره ی عرش خدا یاتوب
بیر قبر واردور عرش کیمی آلتی گوشه لی
واللهی اوردا آینه ی حق نما یاتوب
قربان اولوم او مدفنه که اوردا قول بویون
بی غسل و بی کفن بیر آتا بیر بالا یاتوب
عرض ایلسم بهشت، بهشت ایلر افتخار
اوردا بهشته علّتِ خلقت آقا یاتوب
بیر قبردور زیارتی ا... زیارتی
اوردا او که فدادی اونا خون بها یاتوب
عریان یارالی پیکری باشدان باشا خدنگ
گویا خدنگیدن پر آچوب بیر هما یاتوب
فریاد او وقتیدن که باجی تاپدی قارداشین
گوردی بدنده وار نه عبا نه قبا یاتوب
باشین کسوبله نعشی قوم اوستونده چاک چاک
گلدن لطیف جسمیده دورت مین یارا یاتوب
گویا که بیر طبق گلی اوراق ایدوبدیلر
هر برگی اوز یرینده دوشوب جابجا یاتوب
نیزه قلج سنق لاری آلتندا گیزلنوب
پیغمبر اوغلی خامس آل عبا یاتوب
عریان گوروبدی رحم قیلوب ایلیوب کفن
مرهم سالوب یاراسینا باد صبا یاتوب
معلوم اولور کسوب دالیدان قاتلی باشین
نعشی دوشوب یوز اوسته، ذبیح القفا یاتوب
بولدی باشین کسن آپاروب کوفیه قوناق
امّا اولوبدی منزلی مطبخ سرا یاتوب
سسلندی دور باجون سنه قربان نه یاتموسان
هانسی یارالی سن کیمی بی اقربا یاتوب
هانسی شهین پوزوبلار سنون تک جلالینی
صاحب لواسی قانه باتوبدور، لوا یاتوب
کیم سو یانندا سن کیمی لب تشنه جان ویروب
جان اوسته سو یرینه ایچوبدور دِما یاتوب
هانسی شهین ئولنده سویوبلار جنازه سین
کیم سن کیمی بلایه دیوبدور بلا یاتوب
هانسی آتا یانندا سنون اکبرون کیمی
نورسته بیر جوان اوزی گلگون قبا یاتوب
داماد ایدوبدی هانسی عمو قارداش اوغلونی
امّا یاخوبدی طویدا اله قان حنا یاتوب
واردور باشیمدا شور حسینی اودور سبب
نی تک سوزیمده پرده به پرده نوا یاتوب
------------------------
نام نوحه : مسلم بن عقیل اثر: مرحوم حسینی


او گون که کوفه ده تک قالدی مسلم بن عقیل

هجوم ایدوب نه قَدَر کوفه نین جماعتی وار

گوروبله شیر خدا یادگاری غیظه گَلوب

اَلینده ساغر، تیغینده مرگ شربتی وار

اجل پیاله سی نوش ایلوری مبارز اولان

عموسی حیدر کرّار تک شجاعتی وار

خیال ایدوبله او شیری کمندیله دوتالار

کمندیسیز دوتا بُلمولّه چوخ رشادتی وار

قازوبلا حیله و مکریله بیر بیوک گودال

ترحّم ایتمه دیلر دلده درد غربتی وار

او شیر صولتی مکریله سالدیلار او یره

عیاندی حیله ده کوفی لرین مهارتی وار

قاچان قِییتدی هجوم ایتدی، هر گَلن ووردی

بیری بیرینه ولی وورماق اوسته سبقتی وار

قلج ووران، داش آتان، خنجره گمانی گَلَن

ووراردی وورماقا گویا ثواب نیّتی وار

او قدر ووردولا دلدن دوشوب، باتوب نفسی

گوروبله کوفه لیلر انتقام فرصتی وار

قلجین آلدیلار اَلدن، قولونی باغلادیلار

ایدوب هامی او که دلخواه هتک حرمتی وار

آپاردیلار نجه ابن زیاد مجلسینه

دیمم، بُلر او که اخباره خبریّتی وار

یِتیشدی بی یره دوردی، دایاندی دیواره

دیدی منه گوره سن بیر کسین حمایتی وار؟

ترحّماً من مظلومه بیر ایچیم سو ویره

یارالیه عطشین فوقُ العاده زحمتی وار

سو ویرمیوبله، ووروبلار علاوه دل یاراسی

گور اهل کوفه نین انصافی وار، مروّتی وار؟

یانیقلی سوزلری تاثیر ایدوبدی بیر نفره

دیدی پیمبریله مسلمین قرابتی وار

سو ایچسه ده اُله جاق بو غریب، ایچمَسه ده

سو ویردی، مسلم آلوب گوردی میل و رغبتی وار

جگر حرارتینی ایسته دی ایده خاموش

آلار حرارت قلبی، سویون برودتی وار

سو کاسه سین یتوروب تا او قانلی لبلرینه

ایچَمندی، گوروب افعالین عکس صورتی وار

توکولدی دیشلری، قانیله دولدی سو جامی

دیمه سرین سودان عالمده بیرده قسمتی وار

حضور ابن زیاده نجه گَلوب دیمَرَم

مگر بیان ایده بیر کس او حالی جراتی وار

او مجلسین گِچورم ماجرای صحبتینی

آچوخ مصیبتی ذکر ایتماقین مذمّتی وار

صاقا صولا دولانوب باخدی ابن سعده دیدی

بو گون سنه بو غریبون نچه وصیّتی وار

منیم جنازه می دفن ایله، قویما یره قالا

جنازه قالسا سنه خلق ایچینده خفّتی وار

ایکیمجیسی بودور اصنافِ شهره بُورجوم وار

او قرضه بو زره و تیغیمون کفایتی وار

اوچومجیسی بودی من نامه یازمیشام آقاما

بو شهره گَلماقا اول نامه نین کنایتی وار

اماندی یاز اونا بو شهره یا حسین گَلمه

بو شهریده سنه اعدانون اکثریّتی وار

سوزین قوتاردی نماینده ی امام مبین

سفیره باخ، نجه سلطانه قصد قربتی وار

ویریلدی مسلمه دارُالعماره بامی مقام

دیمه کی کوفه نین اوندان اوجا عمارتی وار

او بامیدن دولانوب باخدی بیر حجازه طرف

صبا یِلیندن او باخماقدا بیر سفارتی وار

دیدی اماندی حسین گَلمه کوفیه بولارین

اورکده کینه سی وار، دللرینده نصرتی وار

سوزین دیوب او یانان سینه دن چکوب بیر آه

اجل پیاله سینین گوردی خوش سِقایتی وار

بدن یارالی، اوجا بام، بی حیا جلّاد

بخلدی بُلورم ا... بُلر نه حالتی وار

باشی کَسیلدی، بدن بامیدن یره دوشدی

سبب او زحمتی دور چوخ جلال و رفعتی وار

عدو اَیاقینه ایپ سالدی، کوچه ده سورودی

دیموبله بَسدی، بونون بیر بیله جراحتی وار

وصیّت ایتمیشیدی ابن سعد دفن ایلسون

وصیّتین نجه گور بیر نقیض آیتی وار

یارالی پیکرینه اولدی بیر بیوک توهین

نه قدر مُنتَقمین صبری وار عطوفتی وار

او شهری ایتدی حق لوط شهری تک بر باد

بو علّته که علینون او یرده تربتی وار

ووروبلا مسلمی قصّابیلر قَناره سینه

او شهرین اهلینون افعال بَربَریّتی وار

قَناره لردن آسولّار گهی جفائیله

وجود مسلمی بُلموبله چوخ شهامتی وار

آسولّا گاه حسینون باشین باسولّا داشه

دیولّه بو باشا ظلم اولسا حق رضایتی وار

آچوب آقاشدان او باشی ایدوبله زیبِ جدا

دوروب جدا بویی گون زینبون قیامتی وار

حسینی کوفه نی باغ بهشته ایتمز عوض

چون اوردا سوگُلوسی مسلمین زیارتی وار


شاعر : سید رضا حسینی ( سعدی زمان)

نام شعر :درد امام زمان اثر : مرحوم حسینی سعدی زمان تبریزی

گیجه گوندوز حسینه حضرت صاحب زمان آغلار
بو نو عیله ایدر ندبه گلر فریاده قان آغلار
فلک تأخیره سالدی اولمادیم دنیاده یا جدّا
گلیدیم تک قالان وقته سنه امداده یا جدّا
گئچدیم شوقیله باشدان ایئدیم جانیمی قربان
جماد ایلوب با تیدیم قانیمه دعواده یا جدا
دیار کربلاده اولمادیم بو فیضه من نایل
اونا قیلام عوض کلَّم اولنجه داده یا جدا
او وقته خیمه گاهه ذوالجناهون یوز قویوب نالان
عیالون خیمه دن چِخدی همان اثناده یا جدا
«حسینى» یا حسین دلتنگ اولوب طعن و شماتتدن
اماندم قبل توجه و هر صله دنیا ده یا جدا

----------------------

لینک مطالب مرتبط با گلچین اشعار و نوحه ها:برای مشاهده روی هریک از لینکهای زیر کلیک نمایید:

 

نوحه(محرم باشلاندی) مرحوم استاد منزوی اردبیلی

 

نوحه (قمربنی هاشم)  مرحوم استاد منزوی اردبیلی

 

نوحه (رقیه) مرحوم استاد منزوی اردبیلی

 

نوحه (علی اکبر) مرحوم استاد منزوی اردبیلی

 

نوحه (علی اکبر)قسمت 2 مرحوم استاد منزوی اردبیلی

 

نوحه (سجده گاه زینب) مرحوم استاد منزوی اردبیلی

 

18نوحه اثر مرحوم استاد منزوی اردبیلی

 

16نوحه اثر مرحوم استاد منزوی اردبیلی

 

گلچین اشعار و نوحه های مرحوم استاد سید رضا حسینی (سعدی زمان) :

 

گلچین اشعار و نوحه های مرحوم استاد محمد حسین جنتی مقام (صحاف)

 

گلچین اشعار و نوحه های مرحوم استاد ذهنی زاده(سائل)

 

گلچین اشعار و نوحه های فارسی مرحوم استاد حسین شانی

 

گلچین اشعار و نوحه های ترکی مرحوم استاد حسین شانی

 

گلچین اشعار و نوحه های مرحوم استاد خوندل تبریزی

 

گلچین اشعار و نوحه های مرحوم استاد خازن تبریزی

 

نوحه های شور ترکی

 

گلچین نوحه های ترکی

 

گلچین اشعار ایام فاطمیه