نام نوحه : ورود شام
نام شاعر : حیدر خسروشاهی متخلص به : ( حزین )

آه و فغان جسارت قوم لئامدن
فریاد گردش فلک نیلفامدن
یا فاطمه اوزون نظر ائت آز قالور دوشه
دل تابدن بو واقعه ده دیل کلامدن
سوز بیر مقامده دایانوب اولماسا نظر
عاجزدی خامه یازماقا سوز بو مقامدن
واردور یری دیسم گوروب اوضاع محشری
اولاد مصطفی جریانات شامدن
داخل اولاندا شامه عیال شه انام
مملوّیدی مسیرلری خاص و عامدن
وارد اولوبلا صبح زمانی او شهره لیک
گون باتمادا اولوبلا خلاص ازدحامدن
بیر صبح شامه تک نه لر اولدی او شهرده
آل علی نه لر گوروب اول صبح و شامدن
شرح و بیان دلده توان یوخ بو قدر وار
تار اولدی گوندوز اونلار لیل ظلامدن
الله بولور نه چکدی بنی فاطمه او گون
جور و جفای ملّت بی ننگ و نامدن
گه طعن ائدوب اسیرلره گه گولردیلر
گه داش آتاردیلار گهی اود کوی و بامدن
راوی دیر او حاله باخوردوم کناردن
حیرتده صبر عترت خیرُالانامدن
قلبیم یانوردی لیک ائدنموردوم آشکار
بیر کیمسیه اوره کده کی سوز ضُرامدن
زنجیر ظلمه سیّد سجّاد باغلانوب
فریاد و داد کینه قوم ظُلامدن
فکر ایلدیم امام گیوب قرمزی لباس
یا للعجب دیدیم بو امام همامدن
قارداشلاری آتاسی اولوب سینه داغلیدی
بیر ایله داغه یوخدی خبر التیامدن
امّا یاخینلاشاندا نه گوردوم که آه آه
قاندور آخور وجود شریف امامدن
زنجیر یاره سیندن او قدری آخوبدی قان
رنگین اولوب لباسی دم سرخ فامدن
ایلوردولر حیا نه پیمبردن اهل شام
قورخوردولار نه قهر حق لاینامدن
ایوای او ظلم لر که کسیک باشلارا اولور
دوشمور ندن بو گردش عالم نظامدن
امّا بیر ایله ظلمله هر بیر یارالی باش
گون تک ایشیق سالور گینه خونین غمامدن

منبع:http://asheghanmovla.persianblog.ir
منبع اصلی : کتاب منشور عاشورا ج1