نام نوحه : احوالات دیر راهب
نام شاعر: غلامعلی شعاع تبریزی متخلص به : ( شعاع )

یارالی کیمسن ایدوب دیریمی نورانی باشون
طور سینادن ایدوب باش بو کلیسانی باشون

دولانوم باشوا ای باشی سالان عالمه شور
نور حق ایلوری بو رأس منوّرده ظهور
وار یری رشگ آپارا بو یره گر وادی طور
برملا گورسه سالار حیرته موسانی باشون

گورمیوب دهرده بیر گوز بیله بیر حسن و جمال
حسن یوسف اولا بولمز بو گوزل حسنه مثال
نیه قانه بلشوبدور بو دل آرا خط و خال
یاندرور حسرت اودوندا دل دنیانی باشون

کیمسن ای شور سالان نه فلکه شور سری
هانسی گلشن گولوسن یا سایلورسان ثمری
آشکارا گورونور سنده حقیقت اثری
حلّ ایدیر عالمه بر سخت معمّانی باشون

گرچه باشون کسیلوب ظلمله یحیا دگیسن
صاحب معجزه سن لیک مسیحا دگیسن
بورا طور اولسادا سن حضرت موسی دگیسن
گوسترور اوزگه عوالملری معنانی باشون

سلب ایدیر کیمسن اورکدن مجنون صبر و قرار
دوتوب اود حالوه هر بیر باخانون قلبی یانار
عارضونده ندی بو خاک مذلّت بو غبار
حشره دین حقلیدی آغلاتسا احبّانی باشون

کیمسن ای عارض چون مهر درخشان دولانان
یارالی باشیله احوالی پریشان دولانان
آردیجا چوللّری بیر دسته پریشان دولانان
چکور آخر هارا بو جمع پریشانی باشون

بولمورم هاردا اولوب ظلمله ویران چمنون
یا گیدوب غارته هاردا چمن پر ثمنون
هاردا باشون کسیلوب هاردا قالوبدور بدنون
سلب ایدیر دلده اولان صبر و شکیبانی باشون

کیمسن ای طعنه وران نور رخی مهر و مهه
اوخشادور حالت مظلومیتون بی گنهه
ووروب هانسی شل اولان آل یارا بو سجده گهه
ویرور عالملره شقّ القمر اعلانی باشون

کیمسن ای کان شرف یوخدی مگر دادرسون ؟
مات و مبهوت قویوب عدنده داودی سسون
دم ویرور قالب بی روحه مسیحا نفسون
حقّه ارشاد ایدوری گبر و نصارانی باشون

کیمسن آیا نه مرامین باشون آواره سیدی
هانسی درد و محنین درد دلون چاره سیدی
بو جبینونده کی یاره آقا نه یاره سیدی
غرق بحر غم ایدور عالم امکانی باشون

کیمسن ای نور رخی عالمی تسخیر ایلین
خلقه قرآنی سر نیزه ده تفسیر ایلین
مشرک و ظالمی برهانیله تحقیر ایلین
قیلدی محکوم به فنا فرقه اعدانی باشون

کیمسن آیا گئدوسن نوک جدالرده هارا
بو حقارتله سنی خوش دگول اعدا آپارا
کیم وروبدور بو لب لعل گهر باره یارا
یارالاردان گل آچوب چون گل رضوانی باشون

دی گوروم کیمسن اسوب گلشنوه باد خزان
غنچه لی گللّی ایچوب سو یرینه ظلمله قان
کیمدی او یاره لی باشلار ویریر انجم کیمی سان
یرده ترتیب ویروب چرخ معلاّنی باشون

کیمسن ای خون دل ایله قارشان اشگتری
چرخ اعجاز و کراماتین ایشقلی قمری
ندی بو عارض گلفامده کی کول اثری
هانسی بی رحمین اولوبدور گیجه مهمانی باشون

کیمسن ای عارض زیباسی بیله قانه باتان
کوللّر اوستونده یاتوب مقصد و مقصوده چاتان
نطقه گل برجه دانش عالمی ای گوزدن آتان
وار نه علّت دولانور کوه و بیابانی باشون

کیمسن ایلور بیله شیون حرم منتجبون
نولی بیرجه گله گفتاره آقا لعل لبون
منتصبدور کیمه واضح ائیله اصل نسبون
قویمویا بحر تفکّرده بو حیرانی باشون

کیمسن آخر دوتوب آلقان ایکی شهلا گوزووی
دوندروب اهل جفا گوزده شبه گوندوزوی
سنی تاری بو دل افکاره نشان ویر اوزوی
اضطرابه سالا چوخ قویما بو نالانی باشون

آچدی بو سوزده گوزون گلدی دله شاه عرب
اوزونی ویردی نشان راهبه تا اولدی سبب
دین اسلامه مشرّف اولوب عرض ایتدی عجب
آچدی بوینومدان آقا رشته عصیانی باشون

ایده سن خوشدی "شعاع " راهبی بو یرده خطاب
یاز حسینون دلیجه جمله سوالاته جواب
اجریوی قوخما ویرر بو شه دین یوم حساب
دولانار اوندا کی شرمنده او صحرانی باشون

منبع :http://asheghanmovla.persianblog.ir
منبع اصلی : کتاب منشور عاشورا ج 1