نام نوحه : قتلگاه کربلا
نام شاعر : صالح

عجب بو زینبوون ماجراسی وار یارالی
باشندا شور دلنده نواسی وار یارالی
نه ماجرا که اونی ابتداده اوّلدن
مگر بیان ایلسم انتهاسی وار یارالی
او ماجرانی نه وار بیرگورن و نه ایشیدن
بولور خدا باشیمون هر قضاسی وار یارالی
بو قدر وار دیه بولّلم بو لشکر شامون
بو زاره حدّیدن آرتوق جفاسی وار یارالی
بیزه بو اهل جفا ظلمونی روا بولوری
اورکده هر نقدر ادعاسی وار یارالی
سنی شهید منی ایلین اسیر دیمور
جزاده هر عملین بیر جزاسی وار یارالی
من آغلارام که گیدوب سن کیمی کسیم الدن
اونون که بیر کسی یوخدور هاراسی وار یارالی
جمال آئینه عشق شاهد ازلین
بو خون سرخیله نور و جلاسی وار یارالی
بو کربلا چولونون وار شباهتی چمنه
باخاندا منظره دلرباسی وار یارالی
هانی سنون کیمی بر گُل چمنده ؟ هانسی گُلون
بیله طراوتی ! بیله صفاسی وار یارالی
بو لاله گون بدنین نوگل بهار کیمی
بو قدر خار آرا نشو و نماسی وار یارالی
نه قدر وار یارا جسمونده زینبین دلده
بو یاره لر عددینجه یاراسی وار یارالی
عجب دگل بو قدر وار یاراسی پیکرون
عجب بودور نه الی نه لباسی وار یارالی
اگر رضا بقاضائک دیدون بولوردون اوزون
که حق سوزونده سنون حق رضاسی وار یارالی
منای عشقدی بو کربلا چولی الحق
که سن کیمی بو منانون فداسی وار یارالی
زبس باجون دولانوب بو چولی دوشوب دلدن
نه طاقتی نه بدنده قواسی وار یارالی
بلائیله گجه گوندوز من اولموشام مأنوس
آنام کیمی باشیمون چوخ بلاسی وار یارالی
دوادی چاره سی دردین ولی منیم دردیم
بیر ایله دردیدی سنده دواسی وار یارلی
دوشه صعوبته بیگانیه دیمز دردین
اونون که سن کیمی بیر آشناسی وار یارالی
نه تک منم بو جهاندا سنون گرفتارون
کمندیون هله چوخ مبتلاسی وار یارالی
تاپوپدی کرب و بلانین یری سنیله شرف
بو تربتین اثر کیمیاسی وار یارالی
گرک اوپم بو یرین تپراقین بو علّته که
بو خاکیده آنامون ردّ پاسی وار یارالی
اساس و پایۀ دین قانویله پایه لنوب
خراب اولان دگی محکم بناسی وار یارالی
حریم کعبۀ جسمونده آل طاهانون
دلنده نیّت سعی و صفاسی وار یارالی
بو قانلو تربتون چشم اهل دنیایه
نقدر واردی جهان توتیاسی وار یارالی
وار احتیاجی دانشدیر ربابی گوگلونی آل
سنه منیم تک اونوندا وفاسی وار یارالی
بالاسی اوخلانان آهو کیمی بو صحراده
اونوندا سود امر اوخلی بالاسی وار یارلی
دوروب کناریده لیلا یواش یواش آغلور
اوجادان ایتموری ناله حیاسی وار یارلی
اسیر عشقون اولاندان اولوب جلای وطن
اونوندا باشدا بیر اوزگه هواسی وار یارالی
نقابیدن دگی خالی عیال عصمت حق
عیال آل عبانون عباسی وار یارالی
بو قانلی ورطه ده آل علی سفینه سنون
بو زینبون کیمی بیر ناخداسی وار یارالی
جهاندا " صالح "و قائم مقامنون آیا
بو آستانه دن اوزگه هاراسی وار یارالی
خاص اولار صف محشرده هول محشرون
او نوکرین که سنون تک آقاسی وار یارالی

منبع : http://asheghanmovla.persianblog.ir
منبع اصلی : کتاب منشور عاشورا ج1