نام نوحه : آخرین وداع سرور مظلوم 
نام شاعر : مرحوم حاج حسن عاصی

باجی بو وداع آخریمدور هنگام شهادتمدی زینب
یغ باشیمه آل مصطفانی دیدار بو ساعتمدی زینب

سن باخما منه که غم پوزوبدور
جاریدی عذاره اشک آلیم
دوروبره ایلورم نظاره
پوزقوندی اوزوم کیمی جلالیم
اوز حالیمه هم سیزه باخاندا
قلبیم یانور آرتوری ملالیم
هر بیر غم و غصه و محندن
آرتوق بو مصیبتمدی زینب

پیرامن دامن حسینی
واردور یری اشک ناب دوتسون
آهیم شرری جهانی یاخسون
دنیانی بو التهاب دوتسون
یوخ بیر کمگیم بو غملو وقتیم
زینب منه تا رکاب دوتسون
یتمیش بیره دین کومکدن آیت
باشسیز قالان عترتمدی زینب

باجی نه پوزول بیله نه آغلا
نه سوز غمه اورک کباب آیت
نه ور یوزیوه نه گل فغانه
نه کثرت غمدن اضطراب آیت
فرض ایت یوخوموش حسین ازلدن
بو عالمی ده فنا حساب ایت
هر حالده ویرمه صبرون الدن
بو عمده وصیتمدی زینب

سن مظهر خیره النساسن
سن دخت شهنشه عرب سن
وار سنده مقام زینبیت
سن معدن عصمت و ادب سن
بیر کس سنه شاینده یتشمز
سن فخر حسین و زین اب سن
فخریم بودی هر ایکی جهاندا
بیر جزو جلالتمدی زینب

بو وقعه کربلا او گونکه
طرح اولدی تمام انبیایه
بالجمله ایدوبله شانه خالی
تن ویرمدیلر بو ماجرایه
من لفظ قبول ویردیم اولدوم
عاشق بو بساط کربلایه
اول لفظ قبوله ایمدی دلدن
هنگام اطاعتمدی زینب

فکر ایتمه بو دشتیده حسینون
یوخدور کومگی قالوب اوغولسوز
سن وحدتمه باخوب اورکدن
چکمه بله آه خانمانسوز
سن باخما یوخومدی یار و یاور
دشمنلر ایچینده سانما یالقوز
یر گوگ هامی بو عوالم اهلی
آماده نصرتمدی زینب

اما بولوسن اولوبدی مخصوص
تنهامنه رتبه شهادت
عزممده خلل تا پولماز اولسا
ذرات هامی سپاه نصرت
ممکن دگی نفس قدرت الله
پیدا ایده حاجت اعانت
هر ذی نفسیکه وار جهاندا
مرهون اعانتمدی زینب

ای فاطمه یادگاری زینب
ناموس خدای حی غفار
بو شیون و داد و آه و ناله
هرگز دگی شانوه سزاوار
آخر گوروسن سن آغلیاندا
خوردا بالالار سراسر آغلار
هرچند اولان سیزه موثر
بو محنت فرقتمدی زینب

چوخ وورما منی یول اوسته لنگه
تیز سال یولا گتملی قوناقم
خلوتگه یاره دعوتیم وار
باشدان باشا شوق و اشتیاقم
یوخ دورماقا فرصت و مجالیم
بی طاقت و صبر و تابی طاقم
اول دعوته عمریدن بو ساعت
هنگام اجابتمدی زینب

مندن صورا غم مراحلنده
سنسن باجی قائد قوافل
همراهون اولور طریق غمده
مین شوقیله حلقه سلاسل
طی ایله حسین آدی دلونده
وار عشقده هر نه که مراحل
بولسونله ایدن ظهور سنده
انوار هدایتمدی زینب

گوزدن هامی ما سوانی آتدیم
سالک اولالی بو راه عشقه
دل ملکنی سیرده سراسر
مقهور ایلدیم سپاه عشقه
وابسته اولوبدی اعتکافیم
مقصوره خانقاه عشقه
آغاز مراسم شهادت
انجام ریاضتمدی زینب

اوضاع و عوالم شهادت
قالمور او قدر تاپا نهایت
ترک ایلمشم تعلقاتی
وار الده ولی ایکی امانت
بیر جان که لزومی واردی اولسون
ایثار تجلی شهادت
بیر ده بو رقیه دور که دلده
سرمایه طاقتمدی زینب

قانیم توکولر ستمله ایلر
تخمیر تراب کربلانی
حشره کیمی خاک دلده ساخلار
چون گوهر پر بلا او قانی
اکسیر حیات اگر چه بیر گون
بالفرض دو تا هامی جهانی
رنجورلره علاج قطعی
خاصیت تربتمدی زینب

من مفخر نفس کایناتم
من علت خلقت جهانم
من سلسله رسلدن ایمدی
تنها یر اوزونده بیر نشانم
با اینهمه بیر گجه گورر چرخ
مطبخده کول اوسته میهمانم
بیر قدرتله او اعتکافیم
ملزوم قناعتیمدی زینب

مندنصورا قوم اشقیایه
منهوب اولی خیمگاه عصمت
یغمایه آچالا ال اراذل
تاراجه گیدر اساس شوکت
تنها نه سنه نه اهل بیته
برپا اولی شورش قیامت
قان ایچره منیمده اولزماندا
غوغای قیامتمدی زینب

من باجی باش اگمرم یزیده
گر ورسالادا سر سنانه
ویرمم او لعینه دست بیعت
ال گلسه زوال ساربانه
حاشا من ایدم قبول ذلت
تن ویرمرم عزت جهانه
بو قانه بویانماقم بو المک
برهان حقیقتمدی زینب
من باجی ذبیح کوی عشقم
بو کرب و بلا منه منادور
فخر ایلسه کربلا منایه
زیبنده دی شاننه سزادور
ثاراللهه قارداشوندی مصداق
قانیم باجی خون کبریادور
کونینده عز و رفعتمدن
بو اسم کفایتمدی زینب
"عاصی"که مقام التجاده
گلزاریمه مرغ خوش سخندور
مهمان شهردور او یرده
بیر عدیه شمع انجمندور
نالانله فاطمی و عابد
بیرده او که سیرتا حسندور
هر تک تکی موقف جزاده
محتاج شفاعتمدی زینب

منبع : http://asheghanmovla.persianblog.ir
منبع اصلی : کتاب منشور عاشورا ج1