نام نوحه : زبانحال امام حسین (ع)
نام شاعر : مرحوم زائر محمدی متخلص به : ( زائر )

هانی قارداشیم اخی بس نه گلوب قارداشیما
یوخسا عباسیم اولوب کول توکولوبدور باشیما

دوتولوبسان بیله چون ابر بهار اوز اوزیوه
توکولور گوز یاشی باران کیمی گوزدن یوزه
زینبون جانی فدا قارداش او آغلار گوزیوه
یوخسا عباسیم اولوب کول توکولوبدور باشیما

آغلاما گل منی محزونی دولاندور باشوا
من فدا قارداش او گوزدن توکولن گوز یاشوا
منه آخر دی گوروم بس نه گلوب قارداشوا
یوخسا عباسیم اولوب کول توکولوبدور باشیما

او سولان رنگوه قربان نیه رنگون سارالوب
نه گلوبدور سنه افلاکه فغانون اوجالوب
یوز ویروبدور سنه نه غم که بیله صبرون آلوب
یوخسا عباسیم اولوب کول توکولوبدور باشیما

گوز یاشون صفحه رخساره روان ایلمه چوخ
منی یاندیرما بیله آه و فغان ایلمه چوخ
پرده چکمه سوزووه باغریمی قان ایلمه چوخ
یوخسا عباسیم اولوب کول توکولوبدور باشیما

باخورام حال دل افکاریوه چوخ برهم اولوب
نیه قلبون بیله پیچیده درد و غم اولوب
نه گلوب سرو قدون غصه و غمدن خم اولوب
یوخسا عباسیم اولوب کول توکولوبدور باشیما

آغلیوب بیر بیله آغلاتما منی ایتمه فغان
قویما قارداش قالا چوخ زینبون آخر نگران
بیر دانش منله حسین درد دلون ایله بیان
یوخسا عباسیم اولوب کول توکولوبدور باشیما

اولا قربان باجون اول دیده گریانه حسین
قان اولان گوگلومی دوندرمه بیله قانه حسین
ویرما اود آهویله بو دل سوزانه حسین
یوخسا عباسیم اولوب کول توکولوبدور باشیما

"زائر"عباس اتگین صدقیله دوت آغلا مدام
آغلاسا هر کیم ابوالفضله اولور دوزخ حرام
بیرده یاز حضرت زینب دلیجه ایله تمام
یوخسا عباسیم اولوب کول توکولوبدور باشیما

منبع : http://asheghanmovla.persianblog.ir
منبع اصلی : کتاب منشور عاشورا ج1